Avstraliya hökuməti İranda etirazların qəddarcasına yatırılması ilə əlaqədar Tehrana qarşı yeni sanksiyalar tətbiq edib.
Crossmedia.az bu barədə xarici mediaya istinadən xəbər verir.
Rəsmi Kanberra sanksiya siyahısını genişləndirərək 20 fiziki şəxs və üç qurumu hədəfə alıb.
Avstraliyanın xarici işlər naziri Penni Vonq bildirib ki, sanksiyalar İran xalqına qarşı zorakılıqda, daxili etirazların amansız şəkildə yatırılmasında, eləcə də həm ölkə daxilində, həm də xaricdə insan həyatına təhlükə yaradan fəaliyyətlərdə iştirak edən SEPAH-ın yüksək rütbəli zabitlərini əhatə edir.
Nazirin sözlərinə görə, Avstraliya hökuməti daha əvvəl də SEPAH-ı terrorçuluğun dövlət sponsoru kimi tanıyıb və İran rejiminin repressiv siyasətinə qarşı prinsipial mövqeyini davam etdirir.
Penni Vonq əlavə edib ki, bu günədək Avstraliya tərəfindən 300-dən çox İran vətəndaşı və qurumuna qarşı sanksiyalar tətbiq olunub və rəsmi Kanberra insan hüquqlarının pozulmasına qarşı beynəlxalq təzyiqin gücləndirilməsini zəruri hesab edir.
