Neft gəlirləri hara gedir? Yeni iddialar
İranın ali rəhbəri Əli Xameneyinin ikinci oğlu Müctəba Xameneyi ölkədə davam edən iqtisadi böhran və etirazlara baxmayaraq, beynəlxalq miqyasda geniş daşınmaz əmlak şəbəkəsi formalaşdırıb.
Crossmedia.az xəbər verir ki, bu barədə "Bloomberg" agentliyi məlumat yayıb.
Məlumata görə, Müctəba Xameneyinin Böyük Britaniya, BƏƏ və bir sıra Avropa ölkələrində malikanələr, villalar və milyonlarla funt sterlinq dəyərində daşınmaz əmlak obyektləri var. Bildirilir ki, bu şəbəkə əsasən Böyük Britaniyanın sanksiya tətbiq etdiyi iranlı bankir Əli Ənsari vasitəsilə qurulub.
Agentliyin yazdığına görə, Müctəba Xameneyi İran daxilində və xaricdə müxtəlif şirkət və qurumlarda mühüm paylara sahibdir və faktiki nəzarəti həyata keçirir. Əli Ənsari isə bu aktivlərin rəsmi sahibi qismində çıxış edir və maliyyə hesablarını idarə edir.
Hesabatda qeyd olunur ki, xaricdəki investisiyalar əsasən İran neftinin satışından əldə olunan vəsaitlər hesabına maliyyələşdirilib. Bununla yanaşı, Müctəba Xameneyi aktivləri birbaşa öz adına rəsmiləşdirməkdən yayınır.
Bloomberg-in təhlilində vurğulanır ki, Müctəba Xameneyi İranın siyasi sistemində getdikcə daha mühüm rol oynayır, SEPAH ilə sıx əlaqələrə malikdir və ali rəhbərin mümkün varisi kimi dəyərləndirilir.
14:29 29.01.2026
Oxunuş sayı: 461
