Azərbaycan və Macarıstan Diaspor təşkilatları arasında əlaqələrin gücləndirilməsi müzakirə olunub
Azərbaycan Respublikasının Diasporla İş üzrə Dövlət Komitəsinin sədri Fuad Muradov Macarıstan Respublikasının ölkəmizdəki fövqəladə və səlahiyyətli səfiri Tamaş Yojef Tormanla görüşüb.
Crossmedia.az xəbər verir ki, Prezident İlham Əliyevin rəhbərliyi ilə aparılan uğurlu diaspor siyasətindən danışan komitə sədri, həmçinin Türk Dövlətləri Təşkilatının (TDT) diaspor məsələlərinə məsul qurumların başçılarının bu günlərdə keçiriləcək görüşünə Macarıstanın ev sahibliyi etməsinə diqqət çəkib. Bildirib ki, tədbir iştirakçı ölkələr arasında əlaqələrin dərinləşməsinə, yeni əməkdaşlıq formatlarının yaradılmasına töhfə verəcək.
Qonağa xarici ölkələrdəki Azərbaycan Evləri, həftəsonu məktəbləri, Koordinasiya Şuraları kimi çoxistiqamətli layihələr, həmçinin beynəlxalq informasiya məkanının güclü aktoruna çevrilən diasporumuzun fəaliyyəti barədə geniş məlumat verilib.
Səmimi qəbula görə təşəkkürünü bildirən səfir ölkələrimiz arasında mədəni əlaqələrin genişlənməsinin vacibliyindən söz açıb, Macarıstanın hər zaman Azərbaycanın haqlı mövqeyini dəstəklədiyini bildirib. Xarici ölkələrdəki macar icmaları barədə müfəssəl məlumat verən qonaq, eyni zamanda ölkələrimiz arasında əməkdaşlığın müxtəlif sahələrdə, o cümlədən diaspor fəaliyyəti sahəsində uğurla davam etdiyini və bundan sonra daha da güclənəcəyinə ümidvar olduğunu bildirib.
Görüşdə Azərbaycan və Macarıstan diaspor təşkilatları arasında əlaqələrin gücləndirilməsi, mədəni-humanitar layihələrin təşviqi, xüsusilə gənclər üçün mübadilə proqramlarının çoxalması və ortaq layihələrin həyata keçirilməsinin əhəmiyyətindən danışılıb.
Bununla yanaşı, Türk Dövlətləri Təşkilatına üzv və müşahidəçi ölkələrin diaspor qurumlarının rəsmiləri üçün təşkil olunan II “INTERNSHIP” (təcrübə) proqramı iştirakçılarının ölkəmizə, o cümlədən Qarabağa səfərləri də diqqət mərkəzinə gətirilib.
Tamaş Yojef Torman Azərbaycan dilinə sevgisini və dilimizi öyrənmək istəyini ifadə edib. Səfirə Diasporla İş üzrə Dövlət Komitəsinin dəstəyi ilə xaricdəki soydaşlarımız üçün çap olunan “Azərbaycan dili” və Azərbaycan dilini öyrənmək istəyən xaricilər üçün hazırlanan “A grammar of contemporary Azerbaijani” (“Müasir Azərbaycan dilinin qrammatikası”) kitabları hədiyyə olunub.
Görüş qarşılıqlı əməkdaşlığın perspektivlərinə dair fikir mübadiləsinin aparılması ilə yekunlaşıb.
12:00 01.12.2025
Oxunuş sayı: 1896
