Siyasi manipulyasiya: “Ukrayna hücuma keçə bilər” bəyanatının elə ciddi əsası yoxdur
“ABŞ Prezidenti Donald Trump bəzi bəyanatlarla gündəmdədir. Ümumiyyətlə, onun bəyanatları bəzən zəlzələyə bənzəyir — nə deyəcəyi, hansı reaksiya verəcəyi əvvəlcədən bilinmir. Prinsipcə, bəzi açıqlamaları əsassızdır. Məsələn, “Ukrayna hücuma keçə bilər” bəyanatının elə ciddi əsası yoxdur”.
Bu fikirləri Crossmedia.az-a açıqlamasında hərbi ekspert Şair Ramaldanov deyib.
O bildirib ki, Ukrayna, demək olar, hər gün itkiyə məruz qalır: “Bu itkilər az deyil. Nəticədə Ukraynanın cəbhəsində boşluqlar artır. Şəxsi heyətin çatışmazlığı səbəbindən Ukrayna min kilometrə yaxın cəbhə boyu lazım olan müqaviməti göstərə bilmir. Əlbəttə, Ukrayna əsgərləri döyüşkən, komandirləri savadlıdır. Amma canlı qüvvə çatışmazlığı bu imkanları hücum əməliyyatına çevirməyə imkan vermir. Bir neçə dəfə hücum cəhdləri olub. Məlumdur ki, Ukraynanın əks- hücum əməliyyatları böyük itkilərlə nəticələnib: əvvəl irəliləyiş olub, sonra həmin ərazilər yenidən itirilib. Rusiyanın rəqib ərazilərinə yönələn hücumlarda isə on minlərlə canlı qüvvə sıradan çıxa bilər — bəzi məlumatlara görə, bu, 50–70 min civarında olub. Nəticədə həmin istiqamətlər bərpa olunub. Özü də Suma və digər istiqamətlərdə döyüşlər şəhərə yaxın ərazilərdə davam edir. Hər hücumun hesablaması var: hücum edən tərəf ən azı üç dəfə üstün olmalıdır. Rusiya əhali və digər faktorları nəzərə alaraq belə üstünlüyü yaratmaq imkanındadır. Ukrayna isə bu ehtiyatları haradan toplaya bilər? Bu sual hələ açıqdır. Ola bilər ki, müəyyən istiqamətlərdə məhdud, lokal əks- hücumlar uğurlu olsun, amma bu irəliləyiş digər sahələrdə ərazilərin itirilməsi ilə müşayiət oluna bilər. Və bu halda əks- hücumun davamı üçün güc çatmaya bilər”.
Ekspert əlavə edib ki, Tramp hərbi məsələlərlə bağlı lazımi qədər təcrübəli deyil: “Lakin hazırda bir hərbçi də Ukraynanın hücuma keçə biləcəyini əsaslandırmaqda çətinlik çəkər. Statistikaya görə, son bir il ərzində 18–22 yaşlı gənclərin Almaniyaya müraciətləri artıb — on minlərə çatıb. Yəni müəyyən sayda insanlar Ukraynanı tərk edirlər. Bir il öncə məhdudiyyətlər var idi, sonra həmin məhdudiyyətlər götürüldü və müraciətlər kəskin artdı. Bu məlumat mətbuata çıxıb. Hərçənd mənbəyə nə qədər etibar etmək olar, dəqiq demək çətindir”.
Müsahibimizin fikrincə, müharibənin uzanmasında maraqlı qüvvələr var: “Ona görə də müxtəlif bəyanatlar, o cümlədən hücum xarakterli məlumatlar siyasi məqsədlərlə səsləndirilə bilər. Eyni zamanda Ukrayna prezidenti də Ali Baş Komandan kimi cəbhədə olan uğurları vurğulayı. Bu cür bəyanatlar və addımlar siyasi xarakter daşıya bilər. Trampın mövqeyi də maraqlıdır. O, əvvəl Zelenskiyə kapitulyasiyaya bənzər şərtlər təklif edirdi, indi isə başqa cür danışır. Məncə bu, siyasi manipulyasiyadır. Əgər, həqiqətən də hücum əməliyyatı hazırlanarsa, onu çox vaxt gizli saxlayarlar — əvvəlcədən elan etməzlər. Hücum, yeni silahlar və ya əməliyyat xəbərləri bəzən təbliğat xarakteri daşıyır və qarşı tərəfə xəbərdarlıq funksiyası da yerinə yetirə bilər. Bu isə düşməri məlumatlandıraraq ona qarşı tədbirlər görməyə imkan yaradır”.
“Ümumiyyətlə, Tramp konkret addımlar atmır. Daha çox hərbi-sənaye kompleksi ilə bağlı maraqlar var — müharibənin uzanması bəzi istehsalçı və sənaye dairələrinin gəlirlərini artırır. Tramp dövründə Ukraynaya verilən yardım məhdud olub. Əgər bu gün silah satışları və istehsal artarsa, burada hərbi-sənaye kompleksinin rolu və maraqları nəzərə çarpır. Nəticə olaraq, Ukraynanın hücuma keçmək imkanları məhduddur və belə bir hücum olsa da, vəziyyəti köklü şəkildə dəyişə biləcək gücdə olacağını demək çətindir", - Ekspert əlavə edib.
Ülvi Zahidov
23:02 17.10.2025
Oxunuş sayı: 1315
