Rusiya neftayırma zavodlarının potensialının 17 faizi sıradan çıxarılıb - Ekspert
Rusiyada yanacağın qiymətində müşahidə olunan kəskin artım son günlər ölkə gündəminin əsas mövzularından birinə çevrilib. Rəsmi statistikaya görə, ötən həftə ərzində benzinin qiyməti 0,78 faiz bahalaşıb, ilin əvvəlindən oktyabr ayına qədər isə bu artım ümumilikdə 10,99 faizə çatıb. Maraqlıdır ki, yanacağın bahalaşma tempi ölkədəki ümumi inflyasiya göstəricisini də geridə qoyub. Hazırda Rusiyada 1 litr benzinin qiyməti orta hesabla 64,82, dizelin isə 73,24 rubl təşkil edir.
Yanacaqdoldurma məntəqələrində yaranan uzun növbələr, qiymətlərin sabitləşməməsi və enerji bazarında gərginliyin artması vəziyyəti daha da mürəkkəbləşdirib. Mütəxəssislərin fikrincə, bu böhranın əsas səbəblərindən biri Ukraynanın dron hücumları nəticəsində Rusiyanın enerji və logistika infrastrukturuna ciddi zərbə vurmasıdır. Bu hücumlar yanacaq istehsalında və daşınmasında fasilələr yaradaraq bazarda tədarük çatışmazlığına gətirib çıxarıb. Nəticədə, ölkə daxilində qiymətlərin sürətlə artması həm iqtisadi sabitliyə, həm də əhali arasında narazılığın yüksəlməsinə səbəb olub.
Məsələ ilə bağlı Real partiyasının sədri Natiq Cəfərli Crossmedia.az-a fikirlərini bölüşüb:
"Ukrayna dronlarının hücumu nəticəsində Rusiya neftayırma zavodlarının potensialının təxminən 17 faizi sıradan çıxarılıb. Yəni istehsal gücündə təqribən beşdə birə yaxın azalma baş verib. Bu isə benzinin və dizel yanacağının tədarükündə çatışmazlıqlara gətirib çıxarıb. Hazırkı şəraitə həm də payız yığımının davam etməsi təsir göstərir: Rusiya eyni zamanda aqrar ölkə olduğundan dizel yanacağı sahə işlərində geniş istifadə olunur. Nəticədə yalnız müharibə ehtiyacları üçün deyil, kənd təsərrüfatı üçün nəzərdə tutulmuş benzin və dizel də azalıb".
Ekspert həmçinin bu tendensiyanın rus cəmiyyətində müharibənin gedişi və onun yaratdığı iqtisadi yük barədə narazılıqların artmasına səbəb olduğunu qeyd edib:
"Hücumun əsas məqsədi də məhz Rusiya iqtisadiyyatına zərər vurmaq və əhalinin müharibənin ağırlığını hiss etməsi vasitəsilə müharibənin dayandırılması barədə ictimai rəy formalaşdırmağa çalışmaq idi".
Elmir Heydərli
22:47 17.10.2025
Oxunuş sayı: 7551
