Ekspert: İkili diplom və beynəlxalq tanınma prosesi daha yüksək səviyyədə həyata keçirilməlidir
Elm və Təhsil Nazirliyinin “Elm və təhsilə birgə baxış” layihəsi
çərçivəsində nazirliyin Elm, ali və peşə təhsili şöbəsinin rəhbərliyi və
əməkdaşlarının, həmçinin Türkiyə-Azərbaycan Universiteti (TAU) və Azərbaycan
Texniki Universitetinin rəhbər heyətinin, professor-müəllim və inzibati
heyətinin iştirakı ilə görüş keçirilib.
Görüşün əsas məqsədi iki illik fəaliyyəti dövründə
Türkiyə-Azərbaycan Universitetinin inkişaf istiqamətlərinin
müəyyənləşdirilməsi, qarşıya çıxan çətinliklərin həlli və ali təhsildə
prioritet sahələrin müzakirəsi olub.
Görüş zamanı ali təhsildə idarəetmənin səmərəliliyinin
artırılması, təhsil proqramlarının müasir tələblərə uyğunlaşdırılması, akademik
və inzibati proseslərin çevikliyinin təmin olunması, ikili diplom
proqramlarının təşkili, eləcə də qanunvericilik bazasının təkmilləşdirilməsi
ilə bağlı fikir və təkliflər səsləndirilib.
Tərəflər arasında təhsil sahəsində əməkdaşlıq barədə Crossmedia.az-a danışan təhsil eksperti Rizvan Fikrətoğlu Crossmedia.az-a açıqlamasında bildirib ki, Elm və Təhsil Nazirliyi rəhbərliyi ilə keçirilən görüş, əslində, Türkiyə–Azərbaycan Universitetinin fəaliyyətinin ikinci ilini tamamladığı bir dövrdə, strateji inkişaf istiqamətlərinin müəyyənləşdirilməsi və Azərbaycan ali təhsil sistemində yeni bir modelin formalaşdırılması baxımından çox mühüm mərhələdir: "Bu görüş sadəcə bir tədbir və ya toplantı deyil, iki qardaş ölkənin təhsil əməkdaşlığını idarəetmə səviyyəsində koordinasiya edən strateji bir müzakirədir. Türkiyə–Azərbaycan Universitetinin məqsədi Azərbaycan və Türkiyə arasında elm və təhsil sahəsində ortaq platforma yaratmaq, təhsilin məzmununu beynəlxalq standartlara yaxınlaşdırmaq və regionda qabaqcıl model universitet formalaşdırmaq idi. İki illik fəaliyyət dövrü göstərdi ki, bu istiqamətdə müəyyən uğurlar əldə olunub. Müxtəlif proqramlar açılıb, tələbə qəbulu həyata keçirilib, o cümlədən ingiliscə tədris proqramları üzrə də qəbul təşkil edilib”.
O, görüşün əsas məqsədini də
açıqlayıb: “Türkiyə–Azərbaycan Universitetinin fəaliyyəti sistemli şəkildə
qiymətləndirilsin və onun inkişafı üçün milli və beynəlxalq səviyyədə strateji
xəritə müəyyən edilsin".
Ekspert əlavə edib ki, həmçinin idarəetmədə səmərəlilik daha da
artırılmalı, ikili diplom və beynəlxalq tanınma prosesi daha yüksək səviyyədə
həyata keçirilməli, qanunvericilik və hüquqi mexanizmlərdə mövcud çatışmazlıqlar
aradan qaldırılmalıdır. Görüşdə ali təhsilin idarəetmə səmərəliliyinin
artırılması məsələsi də vurğulanıb. Bu, mahiyyətcə o deməkdir ki,
Türkiyə–Azərbaycan Universiteti kimi ortaq ali təhsil müəssisələrində akademik
və inzibati sferalar arasında koordinasiya gücləndirilməli, universitetin
daxili muxtariyyəti və operativ qərarvermə imkanları təmin olunmalıdır".
Türkan Kərimli
11:59 17.10.2025
Oxunuş sayı: 2528
