Elm və təhsil

BDU ilə ABŞ-ın Mədəniyyət və Təhsil üzrə Nizamnaməli İnstitutu arasında anlaşma memorandumu imzalanıb

Bakı Dövlət Universitetində (BDU) ABŞ-ın Mədəniyyət və Təhsil üzrə Nizamnaməli İnstitutunun (CCEI) prezidenti və Məsləhət Şurasının sədri Vasif Eyvazzadə ilə görüş keçirilib.

Universitetdən Crossmedia.az-a bildirilib ki, görüşdə qonağa BDU-nun təhsil və elmi infrastrukturu, beynəlxalq əlaqələri barədə məlumat verilib. BDU və CCEI arasında institusional potensialın artırılması, tələbə və professor-müəllim heyətinin dəstəklənməsi, peşəkar inkişaf sahələrində əməkdaşlıq imkanları müzakirə edilib. Tələbə və əməkdaşların beynəlxalq sertifikatlı proqramlara qoşulma perspektivləri ətrafında fikir mübadiləsi aparılıb.

Sonda BDU və ABŞ-ın Mədəniyyət və Təhsil üzrə Nizamnaməli İnstitutu arasında anlaşma memorandumu imzalanıb.

Memorandumda tələbələrin karyera inkişafı və həyat dizaynı bacarıqlarının dəstəklənməsi üçün CCEI-nin “Career and Life Design Lab” və əlaqədar proqramlarının tətbiqi, universitetin professor-müəllim və inzibati heyətinin CCEI-nin təlim və peşəkar inkişaf imkanları ilə dəstəklənməsi, ABŞ universitetlərinin idarəetmə, kurikulum dizaynı, elm diplomatiyası və institusional təcrübələri üzrə bilik mübadiləsinin təşkili nəzərdə tutulur. BDU-nun strateji planlaşdırma, keyfiyyət təminatı və qlobal rəqabət qabiliyyətinin gücləndirilməsi üçün məsləhət və ekspert dəstəyi göstərmək də memorandumda əksini tapıb.