Bu sahəyə diqqət və qayğı Birinci vitse-prezident Mehriban xanım Əliyeva tərəfindən göstərilir - Komitə sədri
Valideynlərini itirmiş və valideyn himayəsindən məhrum olmuş uşaqlar, habelə onların arasından olan şəxslər 2600 (iki min altı yüz) manat məbləğində birdəfəlik müavinət alacaqlar. Qərara əsasən, valideynlərini itirmiş və valideyn himayəsindən məhrum olmuş uşaqlar, habelə onların arasından olan şəxslər ümumi təhsil, peşə təhsili, orta iхtisas təhsili və ali təhsil müəssisələrini bitirdikləri zaman müvafiq təhsil müəssisəsinin xərclər smetası hesabına "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının 2025-ci il 7 mart tarixli 151-VIIQD nömrəli Qanununun tətbiqi və bununla əlaqədar bəzi məsələlərin tənzimlənməsi haqqında" Azərbaycan Respublikası Prezidentinin 2025-ci il 1 aprel tarixli 359 nömrəli Fərmanının 2-ci hissəsinə uyğun olaraq 2600 (iki min altı yüz) manat məbləğində birdəfəlik müavinətlə təmin ediləcəklər.
Məsələ ilə bağlı Crossmedia.az-a açıqlama verən Milli Məclisin Əmək və sosial siyasət komitəsinin sədri Musa Quliyev Azərbaycanda valideyn himayəsindən məhrum olmuş uşaqlara diqqətin böyük olduğunu qeyd edib: "Valideyn himayəsindən məhrum olmuş və ya valideynini itirmiş uşaqlara Azərbaycanda dövlət qayğısı ən yüksək səviyyədə göstərilir. Onların həm orta məktəb, həm də universitet təhsili dövründə dərslə bağlı ehtiyacları, paltar və geyimləri dövlət tərəfindən təmin olunur. Dövlət universitetlərində təhsil alan uşaqlar üçün isə ali təhsil müddətində onlara verilən təqaüd qiymətlərindən asılı olmayaraq ikiqat hesablanır.
Eyni zamanda, internat evlərində tərbiyə alan uşaqlar yaşlarına uyğun olaraq qalma müddətini başa vurduqdan sonra onlara ya yataqxana, ya da mənzil verilir və işlə təmin olunurlar.
Bu sahəyə diqqət və qayğı daim hörmətli Birinci vitse-prezident Mehriban xanım Əliyeva tərəfindən göstərilir. Son dövrdə qanunvericiliyə edilmiş dəyişikliklərə əsasən, internat evindən çıxmış və ya valideyn himayəsindən məhrum olmuş, qohum və ya qəyyum himayəsində yaşayan uşaqlar ilk əmək fəaliyyətlərinə başlayarkən onlara birdəfəlik 6.000 manat müavinət verilir. Bu vəsait onların məişət, sosial, geyim və digər ehtiyaclarını qarşılamağa imkan yaradır. Orta məktəbi bitirən uşaqlara isə iş tapana qədər sosial məsələlərini həll etmələri üçün 2.000 manat birdəfəlik müavinət ödənilir".
Deputat həmçinin valideyn himayəsindən məhrum olmuş uşaqların internat evində deyil ailə mühitində böyüməsinin onların sosial və psixoloji inkişafına müsbət təsir göstərdiyini bildirib.
"Beləliklə, bu uşaqlara kifayət qədər diqqət və qayğı göstərilir. Ən böyük önəm isə onların ailəyə qaytarılmasıdır. Uşaqların internat evində deyil, ailə mühitində böyüməsi onların sosial və psixoloji inkişafına müsbət təsir göstərir və bu prosesin uğurla davam etməsini təmin edir"- deyə o əlavə edib.
Elmir
14:16 20.09.2025
Oxunuş sayı: 5087
