Qurumlar çəkindikləri üçün ictimai şura yaratmırlar - Narazılıq artır
İctimai nəzarətin əsas prinsipləri qanunçuluq, obyektivlik, qərəzsizlik, könüllülük, şəffaflıq, aşkarlıq, hesabatlılıq, bərabərlik və ayrı-seçkiliyə yol verilməməsidir. İctimai nəzarətin əsas mexanizmlərinə monitorinq, müşahidə, ekspertiza və müraciətlərin araşdırılması daxildir. Azərbaycan qanunverciliyinə görə, ictimai nəzarət mərkəzi və yerli icra hakimiyyəti orqanları yanında fəaliyyət göstərən ictimai şuralar vasitəsilə həyata keçirilir. İctimai şuralarda QHT-lər, KİV-lər, həmkarlar ittifaqları, məhəllə komitələri və vətəndaş qruplarının nümayəndələri təmsil oluna bilərlər. İctimai nəzarət məsələsini Prezident İlham Əliyev də dəfələrlə öz çıxışlarında vurğulayıb.
İctimai nəzarət şuraları bir qurumun şəffaflığının, obyektivliyinin əsas göstəricilərindəndir. Lakin bu gün Qida Təhlükəsizliyi Agentliyi kimi qurumlar bütün bunları heçə sayaraq mövzuya səthi yanaşır, ictimai şuraların fəaliyyətini nəinki inkişaf etdirmək, ləğv edilməsi üçün hər şeyi edirlər. Xüsusən kütləvi zəhərlənmələr, qidalardan yaranan problemlərin artdığı bir dövrdə, insanların bu quruma ehtiyac və tələblərinin daha da artdığı zamanda agentlik ictimai şuranın fəaliyyət müddətinin 3 aydır bitməsinə baxmayaraq yeni heyət formalaşdırmır. Yeni heyət nə üçün formalaşdırılmır? Burda əsas məqsəd nədir?
Məsələ ilə bağlı “İnformasiya və Sosial Təşəbbüslərə Dəstək” İctimai Birliyinin sədri, QHT.az saytının rəhbəri Cəsarət Hüseynzadə Crossmedia.az-a açıqlama verib: “Bildiyiniz kimi cənab Prezident İlham Əliyev hər zaman çıxışlarında ictimai nəzarətlə bağlı fikirlər səsləndirir. Belə ki, cənab Prezident parlamentdə çıxışında da, müsahibələrində də bu məsələnin vacibliyini dəfələrlə vurğulayıb. Bu fikirlərə istinad edərək deyə bilərik ki, ictimai iştirakçılığın inkişafı hər zaman prioritet olub. Amma çox təəssüf ki, bəzi dövlət qurumları vaxtilə ictimai şura yaratsalar da davamlı fəaliyyət göstərmədilər. Qanunvericiliyə görə 2 ildən bir ictimai şuralara seçkilər keçirilməli, heyət yenilənməlidir. Amma bəzi qurumlar, məsələn Qida Təhlükəsizliyi Agentliyinin ictimai şurasının fəaliyyəti bu il bitib. Artıq üstündən 3-4 ay keçməsinə baxmayaraq agentlik ictimai şura heyətinin yenilənməsi üçün seçki keçirmir. Bu da onu göstərir ki, bu qurum insanları aldadır ki, bizim ictimai şuramız var. Amma o şuranın fəaliyyəti bitib və artıq fəaliyyət göstərmir. Mən deyərdim ki, qida təhlükəsizliyi ölkəmizin vətəndaşlarının sağlamlığı baxımından çox vacib qurumdur. Həm də bu elə qurumdur ki, burada ictimai nəzarətin daha çox olmasına ehtiyac var. Çox gözəl bilirik ki, küçə ticarətində, meyvə tərəvəz, ət və ət məhsullarının satışı ilə bağlı mütəmadi olaraq ekspertlərin kifayət qədər mənfi rəyləri olur. Həm də bu qida sektoru bütün vətəndaşlarla əlaqəli sahədir və burada ictimai nəzarətin davamlı olması vacibdir”.
Ekspert həmçinin qeyd edib: “Mənə elə gəlir ki, qurumlar ictimai nəzarətdən çəkindikləri üçün belə addım atırlar. Amma düşünürəm ki, müəyyən mexanizmlər həyata keçirərək bu kimi halların qarşısını almaq lazımdır. Əvvəl “Azərsu” yanında da ictimai şura var idi. Daha sonra bu qurumun adı dəyişdi, yeniləndi. Amma bu yenilənmə o demək deyil ki, ictimai şuranın fəaliyyəti olmamalıdır. Qanunvericilikdə ictimai şuraların fəaliyyəti, mərkəzi və yerli icra orqanlarının öhdəliyinə qoyulub ki, ictimai şura bu orqanlarda yaradılmalıdır. Həmçinin “Açıq hökumətin təşviqinə dair 2020-2022-ci illər üçün Milli Fəaliyyət Planı” və “Korrupsiyaya qarşı mübarizənin gücləndirilməsinə dair 2022─2026-cı illər üçün Milli Fəaliyyət Planı” açıq şəkildə ortadadır. Bu fəaliyyət proqramlarında ictimai şuraların fəaliyyətinin artırılması, fəaliyyətinin genişləndirilməsi, ictimai nəzarətin inkişafı bir öhdəlik kimi qoyulub. Bəzi qurumlarda ictimai şuraların fəaliyyətinə xitam verilməsi məsələsinə qarşı bir mərkəz yaradılmalıdır ki, buradakı seçkilərə nəzarət etsin. Həmçinin hansı qurumlar ictimai şuranın fəaliyyətini ləğv edirsə bunu da aşkarlamaq lazımdır”.
Ayhan
17:28 09.09.2025
Oxunuş sayı: 9957
