“Qisas” əməliyyatı çərçivəsində Kəlbəcər-Laçın istiqamətində bəzi hərbi postlar...- Deputat açıqladı
Azərbaycanın Baş nazirinin müavini Şahin Mustafayev və Ermənistanın Baş nazirinin müavini Mher Qriqoryan arasında sentyabrın 5-də keçirilən görüşdə sərhəd delimitasiyası və minalardan təmizlənməsi məsələlərinin müzakirəsi regionda sülh prosesinin davam etdiyini göstərir. Mina problemi hələ də həssas mövzulardandır, çünki Qarabağ münaqişəsi sonrası yerləşdirilən minalar həm mülki vətəndaşlara, həm də iqtisadi inkişafa ciddi təhlükə yaradır və delimitasiya prosesini çətinləşdirir. Ermənistan bununla bağlı mina xəritələrini tam və dəqiq şəkildə təqdim etməli, beynəlxalq demininq təşkilatları ilə əməkdaşlığı genişləndirməli və təmizləmə əməliyyatlarında aktiv iştirak etməlidir ki, bu, sülh müqaviləsinin imzalanmasına yol açsın.
Görüşlə bağlı Milli Məclisin deputatı Nizami Səfərov Crossmedia.az-a açıqlama verib:
"Dövlət sərhədlərinin toxunulmazlığı prinsipi müasir beynəlxalq hüquq və qlobal səviyyədə beynəlxalq təhlükəsizliyin təmin edilməsi baxımından fundamental rola malikdir. İlk növbədə nəzərə almaq lazımdır ki, dövlətə məxsus ərazinin və dövlət sərhədlərinin mövcudluğu suverenlik doktrinasının əsas komponentlərindəndir.
Beynəlxalq hüququn aparıcı subyekti qismində dövlətlərin ən mühüm əlamətlərindən birini məhz onların ərazisi təşkil edir. Bunun təsdiqini əhəmiyyətli kodifikasiya nümunəsi olan “Dövlətlərin hüquqları və vəzifələri haqqında” 26 dekabr 1933-cü il tarixli Montevideo konvensiyasının 1-ci maddəsində tapmaq olar. Konvensiyanın diqqəti cəlb edən müddəalarından biri də 11-ci maddədə əksini tapan “dövlətin ərazisi toxunulmazdır və hərbi işğal obyekti ola bilməz” hüquqi tezisidir. Təəssüf ki, beynəlxalq hüquqa daima etinasız münasibət bəsləyən, sivil dövlətlərin ünsiyyət qaydalarına ümumiyyətlə riayət etməyən, beynəlxalq təhlükəsizliyə təhdidlər yaradan Ermənistan Azərbaycan Respublikasına qarşı təcavüz edərək, dövlət sərhədlərini öz xeyrinə dəyişməyə çalışmışdır. Ancaq 44 günlük Vətən müharibəsində əldə edilmiş parlaq qələbə ölkəmizin ərazi bütövlüyünün və suverenliyinin bərpası ilə nəticələnərək, sərhədlərimizin toxunulmazlığının təmin edilməsi məsələsini qətiyyətlə beynəlxalq gündəmə gətirmişdir. Bu kontekstdə post-münaqişə dövrünün ən mühüm problemlərindən birini məhz Azərbaycan Respublikasının dövlət sərhədlərinin bərpası təşkil edir və həmin məsələnin həlli üçün qüvvədə olan beynəlxalq hüququn dəqiq yanaşması mövcuddur".
Deputat mina məsələsi ilə bağlı qeyd edib:
"Ümumiyyətlə mina məsələsində yolveriməz məqamlardan biri də ondan ibarətdir ki, ermənilər bizim ərazilərimizdə basdırdıqları minalar, müharibənin başa çatmasına baxmayaraq, yenə də can almaqda davam edir. Bu günədək ümumilikdə 49 min 395 hektar ərazinin minalardan təmizlənməsinə, minalar və ümumiyyətlə partlamamış hərbi sursatlar aşkar edilərək, zərərsizləşdiriliməsinə baxmayaraq, 240-dan çox mülki şəxs və hərbçi minaya düşərək həlak olmuş və ya öz sağlamlığını itirmişdir. Məlum olduğu kimi, “Qisas” əməliyyatı çərçivəsində Kəlbəcər-Laçın istiqamətində bəzi hərbi postlar Azərbaycan Ordusu tərəfindən nəzarətə götürülmüşdü və təkcə bir məntəqədə 2021-ci ildə Ermənistan tərəfindən istehsal edilmiş 900-dən artıq piyada əleyhinə mina aşkar edilmişdir. Bu fakt bir daha göstərir ki, Ermənistan öz cinayətkar minalama siyasətini həyata keçirməkdə davam edir. Ancaq mənfur qonşumuz hec vaxt unutmamalıdır ki, onu kapitulyasiya aktına imza atmağa məcdur edən qüdrətli dövlətimiz, mina təhlkəsini də dəf edəcək və azad edilmiş ərazilərimizi çiçəklənən diyara çevirəcək".
Ayhan
13:05 07.09.2025
Oxunuş sayı: 11133
