Gündəm
Avropa dövlətlərinin liderləri İlham Əliyevlə şəkil çəkdirmək üçün növbəyə dururlar - Deputat
Son illərdə Azərbaycan beynəlxalq arenada strateji tərəfdaş və etibarlı siyasi oyunçu kimi öz mövqeyini möhkəmləndirib. Macarıstan Xarici İşlər Nazirinin də vurğuladığı kimi, 15 il əvvəl Azərbaycanla hərtərəfli əməkdaşlıq qərarı bəzi Avropa liderləri tərəfindən ironiya ilə qarşılanmışdı. Lakin bu gün vəziyyət tamamilə dəyişib: həmin dövlətlər artıq Azərbaycanla əməkdaşlıq etmək, Prezident İlham Əliyevlə görüşmək və şəkil çəkdirmək üçün növbəyə dayanırlar. Bu fakt Azərbaycanın son illərdə həyata keçirdiyi enerji, nəqliyyat və diplomatik təşəbbüslərin uğurlu nəticəsi, eləcə də ölkənin artan geosiyasi çəkisinin göstəricisidir.
Mövzu ilə bağlı Crossmedia.az-a açıqlama verən Milli Məclisin deputatı Tənzilə Rüstəmxanlı bildirib ki, Avropa liderləri uzun müddət ərzində Prezident İlham Əliyevin hakimiyyətdə olduğu dövrlərdə Azərbaycana məsafəli yanaşıblar:
“Azərbaycanı o qədər kiçik görürdülər ki, bu bölgədə Azərbaycanın bugünkü mövqeyini xəyal belə etmirdilər. O zaman Macarıstan dövləti gerçəkdən Azərbaycanla hərtərəfli əməkdaşlığa imza atan və münasibətini illərlə çox isti saxlayan bir dövlət idi. Bugün isə gəldiyimiz nöqtədə Avropa dövlətlərinin liderləri İlham Əliyevlə şəkil çəkdirmək üçün növbəyə dururlar”.
Deputatın sözlərinə görə, bu uğurun təməlində Azərbaycanın bölgədə əhəmiyyətli dövlətə çevrilməsi və Prezident İlham Əliyevin güclü siyasi gedişləri dayanır: “Xüsusilə Qarabağ zəfərindən sonra Azərbaycan dövlətinin və onun rəhbərinin artan nüfuzu, doğru atdığı addımlar və ölkəsinin maraqlarını ən yüksək səviyyədə qoruyub təmsil etməsi Azərbaycanın həm bölgədə, həm də dünyada dəyərli bir dövlət olduğunu sübut etdi. Liderimizin dəyərli siyasi fiqur olduğunu anlamaq və ona sayğı göstərmək artıq zərurətə çevrilib”.
Tənzilə Rüstəmxanlı əlavə edib ki, bu gün Azərbaycan xalqı dörd illik zəfərin beşinci ildönümünə yaxınlaşarkən həmin qələbənin əhəmiyyətini daha dərindən qiymətləndirir: “Qalib xalq və qalib ölkə imici Azərbaycanın dünya siyasətində söz sahibi olmağının təməl daşıdır. Bu, millətimiz adına atılan hər addımın xalqımıza şöhrət gətirdiyini göstərir. Dövlətimizin ən böyük atributlarından biri də Prezidentlik məqamıdır və onu layiqincə təmsil edən şəxsiyyət isə cənab Prezident İlham Əliyevdir”.
Mehriban Yariyeva
19:10 05.09.2025
Oxunuş sayı: 5725
