Azərbaycan üçün ən böyük NATO onun güclü milli ordusudur - Millət vəkili
Azərbaycan və NATO arasında olan əlaqələr ordumuzun daha da inkişafına yönəlib- Açıqlama NATO-nun hərbi komitəsinin sədri admiral Cüzeppe Kavo Draqone NATO Baş Qərargahında Azərbaycanın hərbi blokdakı nümayəndəliyi ilə görüş keçirib.
NATO rəsmisi bu barədə özünün “X” hesabında məlumat verib.
“NATO Baş Qərargahında görüş fürsəti üçün təşəkkür edirəm. Mən Azərbaycan-NATO əməkdaşlığı barədə müzakirələrimizi yüksək qiymətləndirirəm. Biz tərəfdaşlığımız üçün gələcək fürsətləri araşdırmağa və dialoqumuzu gücləndirməyə davam edəcəyik”,- NATO-nun hərbi komitəsinin sədri qeyd edib.
Məsələ ilə bağlı Crossmedia.az-a açıqlama verən Milli Məclisin deputatı Hikmət Babaoğlu bu əməkdaşlıqda ölkəmiz öz milli maraqlarını təmin edir və bu əməkdaşlıqdan milli mövqeyini möhkəmləndirmək üçün istifadə etdiyini qeyd edib : “Azərbaycan istənilən beynəlxalq, o cümlədən hərbi-siyasi təşkilatlarla əməkdaşlığı öz milli maraqlarının təmininə yönəldir və bu əməkdaşlıqdan milli mövqeyini möhkəmləndirmək üçün istifadə edir.Bununla belə, Azərbaycanın xarici siyasətində hazırda NATO-ya üzv olmaq kimi bir məqsəd mövcud deyil. Çünki NATO mürəkkəb quruluşa malik olmaqla yanaşı, üzv dövlətlərin təhlükəsizliyinin təmin edilməsində tez-tez ikili standartlara əsaslanır. Türkiyə ilə bağlı təcrübə bu məsələdə kifayət qədər aydın nümunədir. NATO üzvü olan Fransa uzun müddət Suriyada Türkiyəyə qarşı mövqe sərgiləmiş, digər bir üzv dövlət – ABŞ isə bölgədə terrorçu qruplaşmaları dəstəkləməklə faktiki olaraq öz müttəfiqinə qarşı hərəkət etmişdir. Bu isə əslində “vəkalət müharibəsi”nin aparılması deməkdir”.
Deputat, həmçinin Azərbaycan bütün bunları nəzərə alaraq NATO-ya ideal yanaşmadığını bildirib : “Azərbaycan bütün bunları nəzərə alaraq NATO-ya ideal yanaşmır. Çünki bu təşkilatın 5-ci maddəsi bəziləri üçün işlək olsa da, digərləri üçün tam əksinə – qeyri-funksional xarakter daşıyır. Bununla belə, Azərbaycan ordusunun gücləndirilməsi və inkişafı üçün NATO standartlarından faydalanmaqda davam edir. Lakin bu gün Azərbaycan üçün ən böyük NATO onun güclü milli ordusudur”.
Elmir Heydərli
12:51 05.09.2025
Oxunuş sayı: 18342
