Rusiya Azərbaycana qarşı hibrid müharibə aparır - Deputat
Son dövrlərdə informasiya müharibəsi beynəlxalq münasibətlərdə ən təsirli hibrid təhdid alətlərindən birinə çevrilib. Rusiya ərazisindən Azərbaycana qarşı başlanmış kütləvi informasiya kampaniyası da bunun bariz nümunəsidir. Saxta məlumatların yayılması, faktların kontekstdən çıxarılması və sosial şəbəkələr vasitəsilə geniş auditoriyaya ötürülməsi ölkəmizin imicinə zərbə vurmaq, cəmiyyətdə çaşqınlıq yaratmaq və regionda gərginliyi artırmaq məqsədi daşıyır.
Azərbaycan Milli Məclisinin Xarici müdaxilələrə və hibrid təhdidlərə qarşı komissiyasının bəyanatı isə göstərir ki, bu təxribatçı kampaniyalar diqqətlə izlənilir və dövlətin suverenliyi, milli maraqlarının qorunması üçün bütün zəruri tədbirlər həyata keçirilir.
Bu barədə Crossmedia.az-a danışan Milli Məclisin deputatı Vüqar İskəndərov qeyd edib ki, son illərdə yalnız müharibələrlə deyil, paralel olaraq hibrid hücumlarla da dövlətlərə təzyiqlər göstərilir: “Hazırda dünyada hibrid müharibələri daha da güclənib. Dövlətlər və təşkilatlar çox vaxt bu yollarla bir-birilərinə təsir etməyə çalışırlar. Təkcə hərbi sahədə yox, texnologiyanın inkişaf etdiyi bir dövrdə şəxsi həyata müdaxilə, maliyyə resurslarına hücumlar da geniş yayılıb. Azərbaycan da bu istiqamətdə mübarizə aparır. Ölkəmizdə bu məsələlərlə məşğul olan mərkəzi icra hakimiyyəti orqanları, eləcə də müxtəlif dövlət qurumlarının tərkibində xüsusi şöbələr fəaliyyət göstərir.”
Deputat bildirib ki, bu istiqamətdə görülən işlər çoxşaxəlidir: “Parlamentdə xarici müdaxilələr və hibrid təhdidlərə qarşı komissiyanın yaradılması məhz belə bir zərurətdən doğub. Komissiya həm profilaktik işlər görür, həm də məlumat bazası formalaşdırır. Zərurət yaranarsa, qanunvericilik təşəbbüslərində də fəal iştirak edir".
V.İskəndərovun sözlərinə görə, son dövrlərdə Azərbaycan-Rusiya münasibətlərində müşahidə olunan gərginlik bu hibrid hücumların fonunda daha aydın görünür: “Rusiyanın ikili mövqeyi açıq şəkildə hiss olunur. Dövlət başçıları səviyyəsində bir mövqe sərgilənsə də, Rusiya parlamentində və hibrid təbliğat sahəsində Azərbaycana qarşı təxribatlar həyata keçirilir. Cəmiyyətin parçalanmasına yönələn bu cəhdlər açıq-aşkar görünür. Əslində, Azərbaycan bu münasibətlərin soyumasında maraqlı deyil, amma ölkəmizə qarşı olan təzyiqlərə də kəskin cavab verir.”
Deputat əlavə edib ki, Rusiya tərəfindən Azərbaycanın informasiya resurslarına hücumlar, azərbaycanlıların sıxışdırılması, iş adamlarına təzyiqlər və digər addımlar sistemli şəkildə həyata keçirilir: “Bütün bunların arxasında vahid mərkəzdən idarə olunan bir siyasət dayanır. Azərbaycan Prezidenti isə milli maraqlardan güzəştə getməyən mövqeyi ilə bir daha göstərir ki, ölkəmizlə təzyiq dili ilə danışmaq mümkün deyil. Hibrid müharibəsinə qarşı yalnız dövlət orqanları deyil, vətəndaşlar da fəal mövqe nümayiş etdirməlidirlər. Bugünkü dünyada təhdidlər, hücumlar çox vaxt elektron mühitdə həyata keçirilir. Vətəndaşlarımız ayıq-sayıq olmalı, təxribatlara uymamalı və lazım olan anda dövlət siyasətinə dəstək göstərməlidirlər. Hər bir vətəndaş bu mənada əsgərdir və vətənpərvərlik nümayiş etdirməlidir".
Deputat, həmçinin media savadlılığının artırılmasının vacibliyini vurğulayıb: “Dövlət bu sahədə mühüm addımlar atır, amma vətəndaş cəmiyyəti də fəal olmalıdır. İnsanların media savadlılığının artırılması, yeni texnoloji biliklərin öyrədilməsi çox vacibdir. Çünki hibrid müharibəsində əsas silah təxribatdır və buna qarşı ən güclü cavab milli həmrəylikdir".
Mehriban Yariyeva
12:47 05.09.2025
Oxunuş sayı: 4977
