Azərbaycanın Rusiya ilə münasibətlərin mülayimləşməsində əsas şərti dəyişməzdir - Deputat
Rusiya Xarici İşlər Nazirliyinin rəsmi nümayəndəsi Mariya Zaxarova Şərq İqtisadi Forumu çərçivəsində keçirilən brifinqdə Azərbaycanda həbsdə olan 13 Rusiya vətəndaşının azad edilməsinin Moskva ilə Bakı arasında münasibətlərin normallaşması üçün vacib addım ola biləcəyini bildirib. Onun sözlərinə görə, bu məsələ avqustun 22-də Həştərxanda Rusiya–Azərbaycan hökumətlərarası iqtisadi əməkdaşlıq komissiyasının iclaslarında ətraflı müzakirə olunub. Zaxarova həmçinin ATƏT-in Minsk qrupunun fəaliyyətinin dayandırılmasına münasibət bildirib. O qeyd edib ki, Rusiya tərəfi Avropa Təhlükəsizlik və Əməkdaşlıq Təşkilatının bu qərarını əsaslı və haqlı hesab edir. Zaxarova münasibətlərin gərginləşməsinin əsas səbəbi hesab edilən rusiyalı hərbçilərin Azərbaycan təyyarəsini vurması və Yekaterinburqda hüquq-mühafizə orqanlarının zorakılıqları barədə açıqlama verməyib.
Həqiqətən 13 Rusiya vətəndaşının azad edilməsi ilə vəziyyət düzələ bilərmi? Niyə bəs Rusiya vurduğu təyyarə ilə bağlı üzrxahlıq etmir, konpensasiya ödəmir, öldürdüyü soydaşlarımızla bağlı lazımi addımları atmır, ancaq bu məsələdən danışır?
Suallarımızı cavablandıran deputat Müşfiq Cəfərov Crossmedia.az-a bildirib ki, son aylar Rusiya ilə Azərbaycan arasında münasibətlər kəskinləşib. Rusiyanın özündə Azərbaycan diasporuna qarşı təzyiqlər, səbəbsiz həbslər, Yekaterinburqda azərbaycanlı qardaşlarının öldürülməsi, tanınmış diaspora liderlərinin həbsi kimi hadisələr bu gərginliyi daha da artırdı:
"Düşünürəm ki, Moskvanın son açıqlamaları qarşı tərəfə münasibətdə daha yumşaq ton seçməsi və kompromis istəyindən irəli gəlir. Azərbaycan tərəfi həmişə qonşularla, hətta münasibətlərin gərgin olduğu hallarda belə, konstruktiv mövqeyini qoruyaraq, bütün diplomatik kanalları açıq saxlayır. Lakin Azərbaycanın Rusiya ilə münasibətlərin mülayimləşməsində əsas şərti dəyişməzdir".
Müsahibimizin sözlərinə görə, 2024-cü ilin dekabrında vurulan sərnişin təyyarəsinə görə Rusiya rəsmi üzr istəməli, kompensasiya ödəməli və məsul şəxsləri məsuliyyətə cəlb etməlidir. Bu baş verdiyi halda, Bakı münasibətlərin normallaşması istiqamətində irəli addımlar atacaqdır. Yəni hər iki dövlət bu sahədə öz öhdəsinə düşəni həyata keçirməlidir: "Moskva hazırda Bakıda həbsdə olan Rusiya vətəndaşlarının azad olunması variantları üzərində işləyir. Rusiya XİN sözçüsü Mariya Zaxarova son açıqlamasında bildirib ki, “Azərbaycanda saxlanılan rusiyalıların azad edilməsi dövlətlərarası münasibətlərin sabitləşməsi prosesində əhəmiyyətli addım olardı”. Amma Rusiya münasibətlərin normallaşması üçün öz öhdəliyinin nə olduğunu unudur və ya unutdurmağa çalışır. Rusiya çalışır ki, Azərbaycanla münasibətləri yaxşılaşdırsın, amma bunu üçün də qarşı tərəfin addım atmağını gözləyir. Bütün hallarda unudulmamalıdır ki, dövlətlərarası münasibətlərdə hər şey qarşılıqlı mübadilədən asılıdır".
Niyaz Hacıyev
17:20 04.09.2025
Oxunuş sayı: 5363
