İranın Ermənistandakı səfiri: İrəvan Tehranın maraqlarına zidd heç bir addım atmayacaq
Tezliklə diplomatik missiyası sona çatacaq İranın İrəvandakı səfiri Mehdi Sübhani “Isca News”a müsahibəsində deyib ki, Ermənistan İslam Respublikasının maraqlarına zidd heç bir addım atmayacaq.
Crossmedia.az xəbər verir ki, onun sözlərinə görə, Tehranın istədiyi beş prinsip – milli suverenliyə hörmət, sərhədlərin bütövlüyü, hüquqi səlahiyyət, ikitərəfli anlaşma və sərhədlərin toxunulmazlığı – Bakı və İrəvan arasındakı razılaşmaya daxil edilib.
Sübhani ABŞ-nin vasitəçiliyi ilə Azərbaycan və Ermənistan arasında imzalanması gözlənilən sülh sazişində müzakirə olunan tranzit dəhlizi məsələsində İranın narahatlıqlarının nəzərə alındığını vurğulayıb. Səfir bildirib ki, sənəddə nəqliyyat marşrutu yalnız Azərbaycanın Naxçıvana birləşdirilməsini təmin etməyə yönəlib.
Diplomat qeyd edib ki, Ermənistanın baş naziri Nikol Paşinyan İran prezidenti Məsud Pezeşkianın İrəvana səfəri zamanı Tehranın bütün təhlükəsizlik və iqtisadi maraqlarının təmin edildiyinə zəmanət verib.
Səfirin dediyinə əsasən, Ermənistan və İran arasındakı sərhəd “ümid sərhədi”dir və iki ölkə arasında qonşuluq və əməkdaşlıq gələcəkdə də genişlənəcək. Səfir, İran prezidentinin səfərindən sonra Ermənistan Təhlükəsizlik Şurasının katibinin Tehrana təhlükəsizlik danışıqları üçün yollanmasının tərəflər arasında əməkdaşlığın möhkəmləndirilməsinin göstəricisi olduğunu vurğulayıb.
18:33 03.09.2025
Oxunuş sayı: 7253
