Azərbaycan və Ukraynadan Rusiyaya mesaj: Moskva nəticə çıxarmalıdır
Azərbaycan Xarici işlər nazirinin müavini Samir Şərifov Ukraynanın Azərbaycandakı səfiri Yuri Qusevlə iki ölkə arasındakı strateji tərəfdaşlığı müzakirə edib.
Bu barədə səfir "X"də yazıb.
"Azərbaycan xarici işlər nazirinin müavini Samir Şərifov ilə məhsuldar görüş və səmərəli müzakirə apardıq. Azərbaycanın humanitar yardımının yeni partiyası - enerji avadanlığı artıq Ukraynaya çatdırıldığı üçün minnətdarıq. Strateji tərəfdaşlığımızı daha da gücləndirmək üçün birgə addımlar barədə razılığa gəldik",-diplomat əlavə edib.
İki ölkə nümayəndələri arasında əldə olunan razılaşma barədə Crossmedia.az-a danışan Ağ partiya sədri Tural Abbaslı deyib ki, hazırkı təmasları Rusiya ilə Azərbaycan arasında davam soyuq münasibətlər kontekstindən qiymətləndirmək lazımdır: "Azərbaycan və Ukrayna onsuz da dost və tərəfdaşdırlar. Hər iki aktor separatizmdən əziyyət çəkən dövlətlər kimi illərdir bir - birilərinin ərazi bütövlüyünü dəstəkləyirlər. Bakı və Kiyev arasında hazırkı münasibətlər isə, məncə, həm Rusiyaya, həm də dünyaya verilən mesajdır. Bu mesajdan Moskvanın hansı nəticə çıxaracağını zaman göstərəcək. Fikrimcə, ən ideal variant Rusiyanın Azərbaycanla bərabərhüquqlu əməkdaşlığa çalışmasıdır. Toqquşma və gərginlik nə Bakıya sərf edir, nə də Moskvaya. Münasibətlərin hazırkı səviyyəsinin günahkarı isə özünü hələ də imperiya kimi aparan Rusiyadır. Yeri gəlmişkən, Azərbaycan və Ukrayna rəsmilərinin görüşünü hansısa dönüş nöqtəsi kimi qiymətləndirmirəm. Münasibətlər indiki kimi də davam edəcək. Amma Azərbaycan Rusyanın hazırkı ritorikasına uyğun olaraq Ukraynaya humanitar dəstəyi genişləndirə bilər".
Kənan Novruzov
16:48 03.09.2025
Oxunuş sayı: 1247
