"Viza rejiminin ləğvi Azərbaycanla Çin arasında strateji tərəfdaşlığın dərinləşməsinə möhkəm zəmin yaradır" - RƏY
Azərbaycan Prezidenti İlham Əliyev Çinin Tiencin şəhərində "ŞƏT plyus" formatında görüşdə çıxış edərkən deyib ki, Azərbaycanla Çin arasındakı qarşılıqlı fəaliyyət ikitərəfli gündəliyin bütün spektri üzrə möhkəmlənir.
Dövlət başçısı qeyd edib ki, bu, siyasi, iqtisadi-ticari, sərmayə, enerji, nəqliyyat-logistika sahələrini, rəqəmsal iqtisadiyyatın, elm və texnologiyanın, təhsil və mədəniyyətin inkişafını ehtiva edir:
"Bu ilin iyul ayından bəri hər iki ölkənin vətəndaşları üçün vizasız rejim tətbiq olunur ki, bu da turizmin inkişafına təkan verir".
Bu barədə Milli Məclisin deputatı Ülviyyə Həmzəyeva Crossmedia.az-a açıqlama verib: “Prezident İlham Əliyevin vurğuladığı kimi, Azərbaycanla Çin arasında vizanın ləğv olunması iki ölkə münasibətlərində strateji əhəmiyyət daşıyan addımdır. Bu qərar hər şeydən əvvəl turizmin inkişafına, xalqlarımız arasında qarşılıqlı ünsiyyətin və etimadın möhkəmlənməsinə xidmət edir. Vizasız gediş-gəliş Azərbaycanı Çin bazarı üçün daha da əlçatan edəcək və ölkəmizə gələn turistlərin sayının artmasına şərait yaradacaq. Turistlərin çoxalması nəticəsində mehmanxana, ictimai iaşə, nəqliyyat, ticarət və xidmət sektorlarında canlanma müşahidə olunacaq, yeni iş yerləri açılacaq, yerli sahibkarların gəlirləri yüksələcək. Bundan başqa, bu qərar yalnız turizmlə məhdudlaşmır, həm də iqtisadi əməkdaşlığın digər sahələrinə də töhfə verəcək".
O bildirib ki, Çindən gələn biznes nümayəndələri və investorlar ölkəmizin iqtisadi potensialı ilə yaxından tanış olacaq, bu isə birgə layihələrin və yeni sərmayələrin artmasına zəmin yaradacaq: "Eyni zamanda, bölgələrə turist axınının güclənməsi regional inkişafı dəstəkləyəcək, kənd təsərrüfatı və yerli istehsal sahələrinə əlavə bazar imkanları yaradacaq. Bütün bunlar Azərbaycanın iqtisadiyyatının diversifikasiyasına xidmət etməklə yanaşı, ölkəmizin beynəlxalq turizm xəritəsində nüfuzunu artıracaq. Vizanı ləğv etməklə atılan bu addım Prezident İlham Əliyevin uzaqgörən siyasətinin daha bir təsdiqi olmaqla, Azərbaycanla Çin arasında strateji tərəfdaşlığın dərinləşməsinə möhkəm zəmin yaradır”.
Ayhan
15:56 02.09.2025
Oxunuş sayı: 13359
