Rusiya Cənubi Qafqazda ikinci bir cəbhə açarsa, bu onun məhvinə gətirə bilər - Açıqlama
"Azərbaycan və Ermənistan arasında davam edən sülh danışıqları Cənubi Qafqazda dayanıqlı sülhlə nəticələnəcək". Bu sözləri Türkiyə Prezidenti Rəcəb Tayyib Ərdoğan Çində Şanxay Əməkdaşlıq Təşkilatı (ŞƏT) sammiti çərçivəsində rusiyalı həmkarı Vladimir Putinlə görüşündə deyib. Lider onu da vurğulayıb ki, Qafqazda sabitlik Türkiyə və Rusiyanın maraqlarına cavab verir. Bəs görəsən Moskva və Ankaranın Cənubi Qafqazla bağlı maraqları üst üstə düşürmü?
Crossmedia.az mövzu ilə bağlı politoloq Natiq Mirinin fikirlərini təqdim edir: "Türkiyə prezidenti Rəcəb Tayyib Ərdoğan əslində bu fikri vurğulamaqla olmalı olanı qeyd edib, amma reallıqda bu belə deyil. Rusiya hər zaman Cənubi Qafqazı özünün ətrafında fırlanan bir orbit kimi qəbul edib və arxa bağçası hesab edir. Bu bağçaya digər xarici müdaxilələri qəbul etmir. Baxmayaraq ki, artıq belə bir məcburiyyət yaranıb. Türkiyə və digər qlobal aktorlar Cənubi Qafqazda mövcuddurlar. Bir tərəfdə 44 günlük Vətən müharibəsi prosesində Türkiyənin Azərbaycanda varlığı Cənubi Qafqaza sirayət etməsinə imkan açdı və Türkiyənin mövqeləri bu gün Cənubi Qafqazda təsirlidir. Başqa bir tərəfdən son hadisələr, xüsusilə də Vaşinqtonda 8 avqustda paraflanan sülh sənədi, eyni zamanda nəqliyyat kommunikasiyalarının açılması ilə bağlı memorandumun imzalanması regiona qlobal güc olan ABŞ-ın gəlməsinə yol açdı və bu uzun müddətli kimi görsənir. Təbii ki, Rusiya bundan ciddi şəkildə narahatdır. Ancaq Rəcəb Tayyib Ərdoğan Cənubi Qafqazda Azərbaycan və Ermənistan arasında münaqişənin bitməsi konteksində sülhün bərqərar olmasının həm Türkiyə, həm də Rusiyanın maraqlarına xidmət etdiyini bildirməsi, o deməkdir ki, bunun əksi Rusiyanın maraqlarına zərbə vuracaq".
Politoloq qeyd edib ki, Cənubi Qafqazda ikinci cəbhənin açılması Rusiyanın məhvinə gətirə bilər: "İndiki vəziyyətdə Ukrayna bataqlığında getdikcə dərinlərə batan Rusiya özü üçün Cənubi Qafqazda ikinci bir cəbhə açarsa, bu Rusiyanın məhvinə gətirə bilər və yaxudda hər hansı süni bir təxribat, hərbi müdaxilə sadəcə region dövlətlərinin qarşıdurması ilə məhdudlaşmayacaq. Çünki regionda başqa dövlətlər də var. Türkiyə, ABŞ, Avropa Birliyinin nümayəndələri mövcuddur. Bu da o deməkdir ki, Rusiya prosesə dağıdıcı güc olaraq müdaxilə edərsə digər qüvvələrin prosesə müdaxiləsinə zəmin yaranacaq. Bu da Rusiyanın indiki zəif durumunda onun maraqlarına xidmət etmir. Rəcəb Tayyib Ərdoğanın dediyinin bir yönü bir istiqamətidə dolayısı ilə budur. Rusiya üçün ən doğru olan Cənubi Qafqazda sabitliyin qorunması, sülhün bərqərar olmasıdır"
Niyaz Hacıyev
15:17 02.09.2025
Oxunuş sayı: 1024
