"Artıq Ermənistan da gördü ki, sözlə nəsə etmək olmur" -RƏY
İkinci Qarabağ müharibəsindən sonra Azərbaycan tərəfinin qətiyyətlə tələb etdiyi tək məsələ sülhün tez bir zamanda əldə edilməsi idi. Ermənistan müharibədən keçən 5 il ərzində bacara bildiyi qədər prosesləri ləngitdi, havadarları sayəsində sülh prosesini gecikdirdi. Azərbaycan tərəfinin tələbləri bu müddət ərzində gözardı edildi. Lakin bu gün Azərbaycanın düzgün siyasəti nəticəsində Ermənistan və havadarları mövcud reallıqlarla barışmağa məcbur oldular. Vaşinqtonda sülh müqaviləsi mətninin paraflanması həm Ermənistana həm də havadarlarına sülhdən yayınmağa imkan verməyəcək. Ermənistan baş naziri Nikol Paşinyan da qeyd edir ki, Vaşinqtonda əldə olunmuş razılaşmalar region üçün tarixi dönüş nöqtəsidir. Ermənistan bu gün aydın şəkildə başa düşür ki, sülhdən və Azərbaycanın tələbləri ilə razılaşmaqdan başqa yolu yoxdur.
Milli Məclisin deputatı Naqif Həmzəyev bu barədə Crossmedia.az-a açıqlama verib: “Vaşinqtonda Azərbaycan və Ermənistan liderləri arasında məhz ABŞ prezidenti Donald Trampın da iştirakı ilə bəyanat imzalandı. Bu bəyanatdan da görürük ki, hər iki tərəf real olaraq sülhü istəyir. Bu sənəd imzalanana qədər Ermənistanın bəhanələr gətirərək prosesləri ləngitdiyini görürdüksə, Vaşinqtonda sülh mətninin paraflanmsından sonra Ermənistanın bu prosesdən yayınması real görünmür. Xüsusilə də Çində baş tutan görüş zamanı Ermənistan baş naziri Nikol Paşinyanın əldə olunan razılıqlara sadiq qaldıqları mesajını verməsi onu deməyə imkan verir ki, Ermənistan tərəfi götürdükləri öhdəlikləri mərhələli şəkildə yerinə yetirəcək. Azərbaycanın əsas şərtlərindən biri olan ATƏT-in Minsk Qrupunun ləğv edilməsi məsələsi də öz həllini tapdı. Digər iki şərt qalır və düşünürəm ki, Ermənistan bu şərtləri də yerinə yetirəcək. İrəvan ötən illərlə müqayisədə proseslərə daha ciddi yanaşır. İstənilən halda sülhün əsas tərəfdarı Azərbaycan idi. Azərbaycan Zəngəzur dəhlizinin işə düşməsini istəyən və çalışan yeganə tərəf idi. Bu istəklər də reallaşmaq üzrədir. Hazırda Azərbaycan və Ermənistan arasında olan təmaslar Zəngəzur dəhlizinin Ermənistan tərəfdən keçən hissəsində təmir işlərinə başlamaqla bağlıdır. Azərbaycan prosesləri nəzarətdə saxlayır və biz inanırıq ki, Ermənistan bu prosesləri də ləngitməyəcək. Bu dəhlizin işə düşməsini istəməyən tərəflər var ki, Ermənistana təzyiq edirlər. Ancaq Azərbaycan, Türkiyə və ABŞ Zəngəzur dəhlizi məsələsinin Vaşinqtonda əldə olunan razılaşma əsasında həll edilməsində maraqlıdır”.
Deputat həmçinin bildirib: “Təəssüflər olsun ki, bu gün sülhün reallaşmasına mane olan tərəflər də var. Prosesləri ləngitmək və hansısa problemlər ortaya çıxarmaq istəyirlər. Ancaq Azərbaycan qətiyyən buna imkan verməyəcək. Və Ermənistan da proseslərin vacibliyini anlayır. Çünki bu şansı Ermənistanda düzgün dəyərləndirməlidir. Çünki ötən 4,5 il ərzində Ermənistan təxribata əl atmasa, Azərbaycanın dediyi şərtlər çərçivəsində prosesin həllinə maraq göstərsə idi məsələ bu qədər uzanmazdı. Bu prosesin bu qədər uzanmasının əsas səbəbkarı Ermənistandır. Artıq Ermənistan da gördü ki, sözlə nəsə etmək olmur. Fəaliyyətə gəldikdə havadarları Ermənistanı tək qoyur. Nəticə etibarilə Ermənistan sadiqlik nümayiş etdirərək bütün öhdəlikləri yerinə yetirməli və bu şansı yaxşı dəyərləndirməlidir”.
Ayhan
13:43 02.09.2025
Oxunuş sayı: 1338
