ATƏT-in Minsk qrupunun ləğvi Azərbaycan diplomatiyasının böyük qələbəsidir - Deputat
1 sentyabr 2025-ci il tarixində ATƏT Nazirlər Şurası ATƏT-in Minsk Prosesi və əlaqəli strukturlarının bağlanması barədə qərar qəbul edib. Qərara əsasən, bu strukturların fəaliyyəti dayandırılıb.
Crossmedia.az-a mövzu ilə bağlı danışan deputat Hikmət Babaoğlu bildirib ki, bu qurum Azərbaycan xalqında mənfi emosiyalar yaradıb, beynəlxalq hüquqdan uzaq hərəkət edərək ermənipərəst mövqedən çıxış edib: "1992-ci ildə, dövrün rəhbərliyinin düzgün, qətiyyətli qərar qəbul edə bilməməsi nəticəsində, torpaqlarımızın müdafiə edilməsini təşkil edə bilmədiklərinə görə ATƏT-in Minsk qrupu kimi eybəcər bir struktur yaradıldı. Beləliklə həmin il ATƏT-in Minsk qrupu adlandırılan, güya problemi həll edəcək süni bir qurum yaradıldı. Fəaliyyəti boyu Minsk qrupu Azərbaycan xalqında mənfi emosiya yaratdı. Çünki beynəxalq hüquqdan uzaq hərəkətlər etməklə ermənipərəst mövqedən çıxış etdi. Yaranmış status kvonu qorumağa çalışdı. Münaqişəni donduraraq Azərbaycanın əl qolunu bağlamağa çalışdı və beləliklə hər dəfə ATƏT-in Minsk qrupunda sədrin bir-birindən daha qərəzli xüsusi nümayəndələrinin təyin olunduğuna şahidlik etdik. Ən sonda polşalı diplomat Anjey Kaşpişik bu vəzifəyə təyin olunmuşdu. Onun hərəkətləri, davranışları sanki Azərbaycana acıq verirmiş kimi bizim ərazidən - Ağdam torpaqlarından keçib Xankəndinə getməyi belə, Azərbaycan xalqının heysiyyatınə toxunurdu. Yəni Minsk qrupu diplomatiya tarixinin ən üzü qara səhifələri kimi yadda qalacaqdır. Onun ləğvi isə hər bir azərbaycanlıda qürur hissi yaradır".
Deputat, Minsk qrupunun ləğvini Azərbaycan diplomatiyasının böyük qələbəsi adlandırıb: "Bu Azərbaycan diplomatiyasının böyük qələbəsidir. Mənə elə gəlir ki, biz bu məsələyə bir neçə aspektdən baxmalıyıq. Birincisi Minsk qrupunun ləğvi özü-özlüyündə mühüm bir hadisədir. İkincisi ATƏT-in Minsk qrupunun fəaliyyətdə olan sədrinin daimi nümayəndəliyinin diplomatik vəzifə kimi ləğv edilməsidir. Üçüncüsü Minsk qrupunun qəbul etdiyi qərarların qüvvədən düşməsidir. Bu Minsk qrupu və onun fəaliyyətinin tamamilə ortadan götürülməsidir. Bu o deməkdir ki, bundan sonra Ermənistan və Azərbaycan münasibətləri kontekstində hadisələr necə inkişaf edirsə etsin, heç bir vaxt heç bir kəs ATƏT-in Minsk qrupuna və onun qəbul etdiyi qərarlara istinad edə bilməyəcəkdir. Çünki qüvvədən düşmüş hesab olunur. Əgər Ermənistanda hakimiyyət dəyişərsə, radikallar gələrsə, yenidən münasibətlər gərginləşərsə, problem yaratmağa cəhd edərlərsə və ATƏT-in Minsk qrupunu yenidən görməyi arzu edərlərsə, artıq istinad nöqtəsi tapılmayacaqlar ki, nə vaxtsa belə bir problem olub və nə vaxtsa hansısa qərarlar qəbul edilib. Bu məsələnin ən önəmli tərəflərindən biridir. Düşünürəm ki, bu bizim diplomatiya tariximizin ən uğurlu nəticələrindən biridir".
Niyaz Hacıyev
12:07 02.09.2025
Oxunuş sayı: 6468
