Azərbaycan Hindistana qarşı diplomatik təsir imkanlarını gücləndirə bilər - Deputat
Azərbaycanın beynəlxalq aləmdə artan nüfuzu ona tərəfdaş və əməkdaşlarla yanaşı müstəqil daxili və xarici siyasətini qısqanan dövlətlər də qazandırır. Azərbaycanın iqtisadi potensialı bütün dünyaya aydındır. Azərbaycan TANAP, TAP və bir çox beynəlxalq iqtisadi layihənin müəllifi və iştirakçısıdır. Həmçinin dünyada sülhü dəstəkləyərək iqtisadi imkanları artırmaq istəyir. Lakin bu iqtisadi potensialı və fəaliyyəti görməzdən gələn Hindistan Azərbaycanın Şanxay Əməkdaşlıq Təşkilatına (ŞƏT) üzvlüyünə veto qoydu. Hətta münasibətlərimizin qeyri-sabit olduğu Rusiya belə obyektiv qərar qəbul edərək Azərbaycanın üzvlüyünü dəstəkləsə də Hindistan obyektiv davranmadı.
Mövzu ilə bağlı Milli Məclisin deputatı Aydın Hüseynov Crossmedia.az-a açıqlama verib:
"Hindistanın Ermənistanı dəstəkləməsi, xüsusilə Azərbaycanla yaxın münasibətləri olan Pakistanla əlaqədar olaraq strateji bir yanaşma kimi görünür. Hindistan, Ermənistanı Azərbaycan və Türkiyəyə qarşı bir balans olaraq görür. Bundan əlavə, Hindistanın Ermənistanla hərbi əməkdaşlıq sahəsində də addımlar atdığı məlumdur. Azərbaycan, Hindistanın bu addımına qarşı müxtəlif reaksiyalar verə bilər. Bunlardan biri diplomatik təsir və ittifaqların gücləndirilməsidir. Azərbaycan, Hindistanın mövqeyinə qarşı olaraq, Pakistan, Türkiyə və Çinlə olan strateji əlaqələrini daha da möhkəmləndirə bilər. Eyni zamanda iqtisadi və ticarət münasibətlərini yenidən qiymətləndirmək də mümkün addımlardandır. Bu, Hindistanın veto mövqeyini iqtisadi sahədə də əks etdirməyə imkan verə bilər".
Deputat həmçinin bildirib:
"Bundan əlavə, Azərbaycan multilateral platformalarda aktivlik göstərə bilər. ŞƏT kimi beynəlxalq təşkilatlarda öz mövqeyini daha da gücləndirərək, Hindistanın bu addımına qarşı beynəlxalq dəstək axtara bilər. Bu vəziyyət Azərbaycan üçün yeni strateji yanaşmaların və diplomatik addımların atılmasını zəruri edir".
Ayhan
23:15 01.09.2025
Oxunuş sayı: 1041
