Politoloq: Azərbaycan və Rusiya arasında iqtisadi əlaqələr qızıl dəyərindədir
Rusiyanın Baş nazirinin müavini Aleksey Overçuk deyib ki, Rusiya və Azərbaycan iqtisadi əməkdaşlığı gücləndirmək niyyətindədir. O qeyd edib ki, hökumətlərarası Komissiyanın son iclasında iqtisadi sahədə əməkdaşlığın inkişaf etdiyi vurğulanıb və iki ölkə münasibətlərinin daha da yaxşılaşdırılması üçün işlərin davam etdiriləcəyi bildirilib.
Overçukun səsləndirdiyi fikirlər barədə Crossmedia.az-a danışan politoloq Tofiq Abbasov bildirib ki, qonşuluq siyasətində həmişə enişli-yoxuşlu proseslər müşahidə olunur və bu təbii haldır:
"Elə qonşular yoxdur ki, onların arasında anlaşılmazlıq olmasın. Diplomatlar arasında belə bir zarafat var ki, ən yaxşısı, ada ölkəsinin deputatı olmaqdır, çünki adalarda qonşu yoxdur. Azərbaycan və Rusiya kimi ölkələr hər tərəfdən qonşularla əhatəlidirlər və vaxtaşırı problemlər yaşanır. Bunlara fəlsəfi yanaşmaq lazımdır. “Əsən soyuq küləklərə” baxmayaraq, bizim iqtisadi əlaqələrimiz qızıl dəyərindədir. Çünki bu əlaqələr bir gündə, bir ayda yaranmayıb, uzun illər boyu inkişaf etdirilib və arxasında böyük ekspert qruplarının zəhməti dayanır. Bu gün atılan addımlar da qısa müddətə yox, uzunmüddətli perspektivə hesablanır. İlk növbədə xalqlarımız arasında dostluq və qonşuluq münasibətləri ön plana çıxır”.
Niyaz Haciyev
19:14 01.09.2025
Oxunuş sayı: 903
