Cənubi Qafqazda böyük oyun: "Deyirlər ki, ABŞ Çinin addımlarından narazıdır..." - Sabiq nazirlə müsahibə
Çində keçirilən Şanxay
Əməkdaşlıq Təşkilatının (ŞƏT) Sammiti çərçivəsində Azərbaycan Prezidenti İlham
Əliyevin Ermənistan Baş naziri Nikol Paşinyan arasında görüş baş tutub.
Liderlər Azərbaycan və Ermənistan liderləri təmasları davam etdirmək barədə
razılığa gəliblər.
Onlar sülhün və normallaşma prosesinin irəlilədilməsinə dair beynəlxalq dəstəyi bir daha təsdiqləyən son Vaşinqton Sammiti zamanı əldə edilən müsbət dinamikanı qeyd ediblər.
Çinlə əldə olunan razılıqlar və Azərbaycanla Ermənistan arasındakı əlaqələrin gələcəyi barədə keçmiş xarici işlər naziri Tofiq Zülfüqarov Crossmedia.az-ın suallarını cavablandırıb.
- Azərbaycan Prezidenti ilə Ermənistan baş nazirinin ŞƏT sammiti çərçivəsindəki görüşdə təmasları davam etdirmək barədə razılıqlarını necə qiymətləndirirsiniz?
- Məlum olduğu kimi, avqustun 8-də Vaşinqtonda keçirilən görüşdə tərəflər sülh məsələsində irəliləyişin əldə olunması üçün qarşılıqlı addımların atılması barədə razılığa gədldilər. Amma hələ görüləsi çox iş var. Hər iki tərəf başa düşür ki, bu, hələ proseslərin başlanğıcıdır. Liderlər arasında görüşlərin müntəzəm keçirilməsi müsbət və məntiqlidir. Yeri gəlmişkən, qeyd edim ki, Çinin özünün də regionla bağlı maraqları var. Bunu nəzərə alsaq deməliyik ki, məhz Çində liderlərin təmasları davam etdirmək barədə razılığı bəyanat etmələri özü də diqqətçəkan məqamdır.
- Sizcə, Pekin və Vaşinqtonun Cənubi Qafqazla bağlı siyasətləri üst- üstə düşürmü?
- Bu gün dünyada üç əsas güc mərkəzi var: Çin, ABŞ və Avropa. Onlar arasında bir çox məsələdə, o cümlədən Cənubi Qafqazla bağlı rəqabət var. Biz həm gözləmə, həm seçim mövqeyində olmalıyıq. Bildiyiniz kimi, Azərbaycanla ABŞ arasında strateji tərəfdaşlıq xartiyası barədə işçi qrup formalaşıb. Bu xartiya Azərbaycanın gələcək təhlükəsizlik arxitekturasında mühüm element ola bilər. İnfrastruktur- nəqliyyat sahəsində Çinin Azərbaycanla da əməkdaşlığı var. Təhlükəsizlik baxımından da müzakirələr gedir. Çinin müdafiə texnologiyaları da Azərbaycan üçün vacibdir. Pakistan- Çin istehsalı olan hərbi təyyarələrlə bağlı Azərbaycan sazişlər imzalayıb. Yəni rəsmi Bakı öz milli maraqlarına uyğun münasibətlərin inkişafına hazırdır.
- Yəni Azərbaycan balanslı siyasətini davam etdirməlidir?
- Bəli. Çoxvektorlu siyasətimiz davam edəcək. Mövcud geosiyasi vəziyyət bunu tələb edir. Əminəm ki, müvafiq qurumlar bu məsələdə fəaliyyətlərini davam etdirirlər.
- Çinin Zəngəzur dəhlizi ilə bağlı hansısa addımlar atması nə qədər realdır?
- Bu, istisna olunmur. Bəzi politoloqlar iddia edirlər ki, guya Zəngəzur dəhlizinə nəzarət etmək bütün kommunikasiya xətlərinə sahib olmaq deməkdir. Bu fikirlər yanlış və əsassızdır. Hər iştirakçı ölkə kommunikasiya xətləri ilə bağlı öz töhfəsini verə bilər.
- Yəni Çinlə ABŞ arasında Cənubi Qafqazla bağlı hansısa gərginlik gözlənilmir?
- Bəzən mövcud mənzərə reallıqdan daha mürəkkəb təqdim olunur. Deyirlər ki, ABŞ Çinin addımlarından narazıdır. Amma belə düşünmək sadəlövhlük olar. Belə siyasi "dumanlar" buraxmaq, cəmiyyəti çaşdırmaq lazım deyil.
14:23 01.09.2025
Oxunuş sayı: 1091
