Rusiyalı diplomatdan Minsk Qrupu ilə bağlı məkrli açıqlama: Proses uzadılır?
Rusiya Azərbaycan və Ermənistanın Avropada Təhlükəsizlik və Əməkdaşlıq Təşkilatının (ATƏT) Minsk qrupunun buraxılması ilə bağlı birgə qərarını dəstəkləyir, qrupun 2025-ci ilin dekabrına qədər tamamilə ləğv edilməsi planlaşdırılır.
Bu barədə Rusiyanın ATƏT-dəki daimi nümayəndəsi Aleksandr Lukaşeviç RBK-ya bildirib.
Rusiyalı diplomatın sözlərinə görə, söhbət üç institutun - Minsk qrupunun, ATƏT-in fəaliyyətdə olan sədrinin şəxsi nümayəndəsi vəzifəsinin və yüksək səviyyəli planlaşdırma qrupunun fəaliyyətinin dayandırılmasından gedir.
"Bu institutların saxlanılmasının məqsədəuyğun olmaması ilə bağlı tərəflərin (Azərbaycan və Ermənistanın) mövqeyini nəzərə alaraq, onların buraxılmasına mane olmaq üçün əsas görmürük", - Lukaşeviç deyib.
O qeyd edib ki, əgər sentyabrın 1-dək heç kim qrupun buraxılmasına etiraz bildirməsə, qərar qəbul edilmiş hesab olunacaq.
"Nəzərə almaq lazımdır ki, bu qərarın icrası ilə bağlı inzibati və maliyyə tədbirlərinin həyata keçirilməsi bir neçə ay vaxt aparacaq. ATƏT-də bu işlərin bu ilin dekabrından gec olmayaraq başa çatdırılacağına ümid edirlər", - Rusiyanın daimi nümayəndəsi vurğulayıb.
Rusiyalı diplomatın açıqlamasını Crossmedia.az-a dəyərləndirən siyasi şərhçi Aydın Quliyev deyib ki, bu, prosesi məqdsədli şəkildə uzatmaq cəhdi ola bilər: “Prosesin uzadılması Ermənistanda revanşçı qüvvələri ruhlandırmaq və ümidlərinin qırılmasının qarşısını almaq cəhdi olmaya? Prezident İlham Əliyev bir neçə gün əvvəl
“Əl- Ərəbiyyə” televiziyasına müsahibəsində Minsk Qrupu ilə bağlı çox tezliklə qərar veriləcəyini demişdi. Xarici işlər nazii Ceyhun Bayramov da bu günlərdə avqustun sonlarında Minsk Qrupu ilə bağlı qərar verilə biləcəyini demişdi...”
Kənan Novruzov
22:37 30.08.2025
Oxunuş sayı: 6104
