Diaspor sədri: TDT-nin ideya bazasını gücləndiririk
“TDT fəaliyyəti türkdilli ölkələr arasında siyasi, iqtisadi, mədəni və humanitar əlaqələrin gücləndirilməsinə yönəlib. Biz diaspor nümayəndələri olaraq bu böyük və strateji əhəmiyyətli əməkdaşlıq platformasına öz töhfəmizi veririk və bu istiqamətdə üzərimizə düşən məsuliyyəti dərindən dərk edirik”.
Bu fikirləri Crossmedia.az-a geniş müsahibəsində Özbəkistandakı Azərbaycan diaspor təşkilatının rəhbəri, Respublika Azərbaycan Milli Mədəniyyət Mərkəzinin (RAzMMM) İdarə Heyətinin sədri Mobil Məmmədov deyib.
“Özbəkistanda fəaliyyət göstərən RAzMMM olaraq, biz təkcə Azərbaycanla Özbəkistan arasında deyil, bütün türk dövlətləri arasında dostluq, qarşılıqlı anlaşma və mədəni yaxınlaşmanın təşviqinə xidmət edən tədbirlər təşkil edirik. Hər il Türk Dünyası Mədəniyyət Günləri, ortaq ədəbi-mədəni irsin tanıdılması, elmi konfranslar və sərgilər vasitəsilə xalqlarımızın birliyinə yönəlik işlər görürük. Bununla yanaşı, gənc nəsildə türk kimliyinin və ortaq tarixi köklərin aşılanması üçün müxtəlif layihələr həyata keçiririk. Tələbələr, ziyalılar və mədəniyyət xadimləri arasında əməkdaşlığı təşviq etməklə, TDT-nin ideya bazasını gücləndiririk. Diaspor təşkilatları olaraq biz TDT-nin xalqlar səviyyəsində daha da yaxınlaşması üçün "xalq diplomatiyası"nı fəal şəkildə həyata keçiririk”, - o bildirib.
M.Məmmədov əlavə edib ki, Türk dövlətləri arasında diaspor əlaqələrinin qurulması, birgə tədbirlərin təşkili və informasiya mübadiləsi bu işin mühüm hissəsidir: “Əlavə olaraq, biz Özbəkistan və digər türk dövlətlərində yaşayan azərbaycanlı diaspor nümayəndələri kimi TDT çərçivəsində qəbul olunan qərarların, təşəbbüslərin mədəni müstəvidə tanıdılması və dəstəklənməsində körpü rolunu oynayırıq. Sonda qeyd edim ki, TDT çərçivəsində birliyin güclənməsi yalnız dövlətlərin deyil, həm də diasporların birgə fəaliyyətindən keçir. Biz bu birliyin daha da möhkəmlənməsi üçün üzərimizə düşəni etməyə daim hazırıq”.
Mehriban Yariyeva
Müsahibənin tam versiyasını aşağıdakı linkdən oxuya bilərsiniz:
https://crossmedia.az/az/article/42822
20:15 29.08.2025
Oxunuş sayı: 1111
