Ermənistan Vaşinqton razılaşmalarını poza bilərmi?: Özü itirəcək - Deputat
Prezident İlham Əliyev "Əl-Ərəbiyyə"
kanalına müsahibəsində deyib ki, güclü xarici müdaxilə olarsa, bəli, bu,
razılaşmaları (Vaşinqtonda Azərbaycanla Ermənistan arasında əldə olunan - red.)
poza bilər.
"Amma bu, Ermənistanın özü üçün çox
zərərli olar, çünki Vaşinqtonda sənədlərin kim tərəfindən imzalanmasından asılı
olmayaraq, onlar Ermənistanın adından Ermənistan lideri tərəfindən
imzalanıb", - deyən dövlətimizin başçısı vurğulayıb ki, əgər orada hər
hansı dəyişiklik baş verərsə və imzalanmış sənəddən geri addım atılarsa, bu,
Ermənistan ilə ABŞ arasındakı münasibətləri ciddi şəkildə pisləşdirər”, - o əlavə
edib.
Dövlət başçısının səsləndirdiyi fikirlər
barədə Crossmedia.az-a danışan Milli Məclisin deputatı Ülviyyə Həmzəyeva deyib
ki, Azərbaycanın davamlı sülhə yönəlmiş siyasəti son illərdə həm regionun, həm
də beynəlxalq ictimaiyyətin diqqət mərkəzindədir: “Prezident İlham Əliyevin Səudiyyə
Ərəbistanının nüfuzlu “Əl Ərəbiyyə” telekanalına verdiyi müsahibə bu diqqətin təsdiqi
oldu. Müsahibədə dövlət başçısı Ermənistanla sülh sazişi, “Zəngəzur dəhlizi”nin
strateji əhəmiyyəti və Azərbaycanın tarixi-mədəni irsinin qorunması barədə
mühüm mesajlar verdi. Prezident İlham Əliyev xüsusi vurğuladı ki, “Zəngəzur dəhlizi”
təkcə iqtisadi və nəqliyyat baxımından deyil, həm də Azərbaycanın hüquqi və
tarixi mövqeyini gücləndirən amildir. Bu dəhliz bölgədə ticarət əlaqələrini,
enerji və kommunikasiya infrastrukturunu genişləndirəcək, qonşu ölkələr üçün də
yeni əməkdaşlıq imkanları yaradacaq. Azərbaycanın təşəbbüsü öz milli
maraqlarını qorumaqla yanaşı, regionun inkişafına xidmət edən qlobal bir layihəyə
çevrilir. Ölkə Prezidenti eyni zamanda xəbərdarlıq etdi ki, əgər Ermənistan əvvəlki
öhdəliklərindən geri çəkilərsə və ya onları görməzdən gələrsə, sülh prosesi
ciddi risk altına düşəcək. Bu, ilk növbədə regionda etimad mühitini zəiflədər, əməkdaşlıq
layihələrinin ləngiməsinə və Ermənistanın iqtisadi-geosiyasi baxımdan daha da təcrid
olunmasına səbəb olar”.
Parlamentarinin fikrincə, belə bir addım
həm də ABŞ-ın vasitəçi kimi nüfuzuna xələl gətirər: “Ermənistan bu davranışla
Vaşinqtonla münasibətlərini gərginləşdirə bilər, Azərbaycan isə razılaşmaya
sadiqliyi ilə etibarlı tərəfdaş mövqeyini gücləndirərək beynəlxalq tərəflərin
inamını daha da qazanacaq. Müsahibədə Prezident İlham Əliyev Azərbaycanın
yalnız ərazi bütövlüyünü deyil, həm də tarixi-mədəni irsini qorumaq və gələcək
nəsillərə ötürmək istiqamətində ardıcıl siyasət apardığını vurğuladı. Bu, ölkəmizin
beynəlxalq hüquqa, tarixi ədalətə və tərəfsiz mövqeyə əsaslanan siyasətinin
bariz göstəricisidir. Ümumiyyətlə hesab edirəm ki, Azərbaycanın siyasəti həm sülhə, həm də regional inkişafa xidmət edir. Ermənistan öhdəliklərdən
yayınmaqla yalnız özü itirən tərəf olacaq. Azərbaycan isə prinsipial
mövqeyindən dönməyəcək, regionda sabitlik və əməkdaşlığın təminatçısı olaraq
qalacaq. Prezident İlham Əliyevin “Əl Ərəbiyyə” telekanalına müsahibəsi bir
daha göstərdi ki, Azərbaycan sülh kursunda ardıcıl və prinsipial siyasət
aparır. Ermənistanın öhdəliklərə əməl etməsi bölgədə davamlı sülhün əsas şərtidir.
Azərbaycan isə öz qətiyyəti, tarixi irsə bağlılığı və beynəlxalq hüquqa
sadiqliyi ilə həm regionun, həm də dünya ictimaiyyətinin etibarlı tərəfdaşı
olaraq qalır”.
Kənan Novruzov
16:38 29.08.2025
Oxunuş sayı: 2990
