İran parlamenti: Zəngəzur dəhlizi təhlükəsizliyə birbaşa təhdid yaradacaq
“Tanınmış sərhədləri dəyişmək, məcburi dəhlizlər yaratmaq və ya Zəngəzur dəhlizi kimi layihələr həyata keçirmək istiqamətində istənilən addım region ölkələrinin maraqları ilə uyğun gəlməyəcək və kollektiv təhlükəsizliyə birbaşa təhdid olacaq”
Crossmedia.az xəbər verir ki, bu barədə İran parlamentinin bəyanatında bildirilir.
Bəyanatda qeyd olunur ki, İslam Parlament Assambleyası (Parlament) ölkə üçün Cənubi Qafqazın strateji mövqeyini vurğulayır.
“Bu region yalnız coğrafi sərhəd deyil, həm də İranın təhlükəsizlik çərçivəsinin, strateji dərinliyinin və sivilizasiya məkanının bir hissəsidir. O, əsrlər boyu İranla möhkəm tarixi, mədəni və hərbi-siyasi əlaqələrə malik olub, bu gün də ərazi bütövlüyünün təminatında və milli təhlükəsizliyin qorunmasında həyati rol oynayır. İran İslam Respublikası öz sarsılmaz prinsiplərinə sadiq qalaraq, həmişə regional məsələlərin region ölkələri arasında birbaşa dialoq yolu ilə, bölgədənkənar qüvvələrin müdaxiləsi olmadan həll olunmasına çalışıb.
Tanınmış sərhədlərin dəyişdirilməsi, məcburi dəhlizlərin yaradılması və ya Zəngəzur dəhlizi kimi layihələrin həyata keçirilməsi region dövlətlərinin maraqlarına ziddir və kollektiv təhlükəsizliyə birbaşa təhdid təşkil edir. Şübhəsiz beynəlxalq prinsiplərə istinad edərək, İslam Parlament Assambleyası xatırladır ki, maraqlı hökumətlərin razılığı olmadan beynəlxalq səviyyədə tanınmış sərhədlərin istənilən dəyişdirilməsi BMT Nizamnaməsinin və dövlətlərin ərazi bütövlüyü prinsipinin açıq şəkildə pozulmasıdır.
İran İslam Respublikası özünün təhlükəsizliyi və milli maraqları üçün hücuma məruz qaldığı halda, qətiyyətlə müdafiə olunmaq üçün bütün siyasi, hüquqi və qanuni vasitələrdən istifadə etmək hüququnu özündə saxlayır. Cənubi Qafqaz yalnız təhlükəsizlik baxımından deyil, həm də İran və bütün region üçün mühüm enerji, tranzit və iqtisadi marşrut kimi həyati əhəmiyyət daşıyır. İranın geoiqtisadi mövqeyinin zəiflədilməsinə yönəlmiş hər hansı iqtisadi və tranzit layihə qəbuledilməzdir. İran bütün region ölkələrinin maraqlarını nəzərə almağı, onların milli suverenliyinə hörmət etməyi vacib hesab edir.
Biz region ölkələrinin hamısını mehriban qonşuluq prinsipinə riayət etməyə, gərginlik yaradan hərəkətlərdən çəkinməyə və bölgədə xarici dövlətlərin iştirakı olmadan əməkdaşlığı genişləndirməyə çağırırıq. İqtisadi və tranzit münasibətlərin inkişafı yalnız mövcud sərhədlər çərçivəsində və qarşılıqlı hörmət əsasında dayanıqlı olacaq. İran İslam Respublikası Cənubi Qafqazda vəziyyətin tənzimlənməsinə bütün regional tərəflərlə əməkdaşlıq etməklə töhfə verməyə hazırdır. İran xalqının nümayəndələri isə istənilən təhdidə cavab verəcəklər”, - deyə bəyanatda bildirilib.
12:45 29.08.2025
Oxunuş sayı: 636
