"Vaşinqton Bəyannaməsində nəzərdə tutulan öhdəliklər mümkün maneəyə baxmayaraq yerinə yetirilməlidir” - RƏY
Azərbaycan Prezidenti İlham Əliyev Səudiyyə Ərəbistanının “Əl-Ərəbiyyə” telekanalına müsahibəsində deyib ki, Azərbaycan torpağında bir nəfər də rus əsgəri yoxdur.
Jurnalistin "Bu münasibətdən sonra Siz Azərbaycanın etməyə çalışdığının qarşısını almaq üçün Rusiyanın hər hansı bir hərəkətə əl atacağından qorxmursunuz? Mən coğrafiyanı, dəhliz və sair məsələləri nəzərdə tuturam" sualına cavabında deyib:
"Onların Ermənistanda hərbi bazası və bir neçə min nəfərdən ibarət hərbi heyəti var. Eyni zamanda, Ermənistanın İran və Türkiyə ilə sərhədi Rusiya sərhədçiləri tərəfindən qorunur. Azərbaycan torpağında bir nəfər də rus əsgəri yoxdur. Beləliklə, Ermənistanda nə baş verə bilər, mən bunu bilmirəm. Lakin mən bu mənfi ssenari haqqında düşünmək istəmirəm".
Məlum olduğu kimi, Cənubi Qafqazda çox ciddi proseslər baş verir. Rusiya nə qədər bunu hiss etdirməməyə çalışsa da, hadisələrə soyuqqanlı yanaşa bilmir. Rəsmi Moskvanın İrəvan vasitəsilə Cənubi Qafqazda bundan sonra da "suları bulandıra bilməsi" istisna deyil.
Milli Məclisin deputatı Məzahir Əfəndiyev mümkün ssenari barədə Crossmedia.az-a danışıb: “Azərbaycan Cənubi Qafqazın lider dövləti olaraq İkinci Qarabağ-Vətən Müharibəsibdən sonra regionda davamlı sülhün təmin olunması üçün çoxvektorlu ardıcıl siyasət həyata keçirir, bu istiqamətdə bütün platformalarda əlindən gələni edir. Regionda siyasi sabitliyin təmin olunması üçün, eyni zamanda, uzun illərdir Şərq-Qərb, Şimal-Cənub nəqliyyat dəhlizlərində yerləşən ölkələrlə, xüsusilə bizə qonşu dövlətlərlə qarşılıqlı hörmət və etimada əsaslanan iqtisadi-ticari əlaqələr qurulub, müxtəlif sahələri əhatə edən sazişlər imzalanıb. Bu gün də Azərbaycan regionda təhlükəsizliyin, əmin-amanlığın, xalqların rifah içində yaşamalarının davamlı olması istiqamətində həyata keçirdiyi siyasətə sadiqdir. Bu baxımdan, 2025-ci il avqustun səkkizində ABŞ-də Azərbaycan Prezidenti İlham Əliyev, ABŞ lideri Donald Tramp və Ermənistanın Baş naziri Nikol Paşinyan arasında imzalanmış tarixi Vaşinqton Bəyannaməsində nəzərdə tutulan öhdəliklər mümkün maneəyə baxmayaraq yerinə yetirilməlidir”.
Zəhra Ağayeva
16:39 28.08.2025
Oxunuş sayı: 5249
