ABŞ 8 avqust razılığından nələr qazandı? -ŞƏRH
Ermənistanın Baş naziri Nikol Paşinyan xalqa müraciətində deyib ki, ABŞ-nin hazırkı Prezidenti Donald Trampın Azərbaycanla münasibətlərin normallaşması prosesində əvəzsiz rol oynayıb.
“Bu prosesdə ABŞ Prezidenti Donald Trampın və onun administrasiyasının rolunu qiymətləndirməmək olmaz. Məhz buna görə də Azərbaycan Prezidenti ilə birlikdə Trampın Nobel Sülh Mükafatına namizədliyini irəli sürmək qərarına gəldik”, - o bildirib.
Əvvəl də dediyimiz kimi, avqustun 8-də Vaşinqtonda əldə olunan razılaşmalardan sonra Cənubi Qafqazda yeni reallıqlar yarandı. Beləliklə, regiona faktiki olaraq sülh gəldi. Növbəti mərhələdə Ermənistandan Azərbaycana qarşı ərazi iddialarını özündə ehtiva edən konstitusiya dəyişikliyinə getməkdir. Bundan sonra tərəflər arasında yekun sülh sazişinin imzalanması üçün heç bir əngəl qalmayacaq.
Məsələ burasındadır ki, 8 avqust razılaşması ilə həm də uzun illər Cənubi Qafqaza arxa bağçası kimi baxan Rusiyanın regiondakı təsir imkanları xeyli azaldı. Bu o deməkdir ki, daha bölgədə asanlıqla “suları bulatmaq” mümkün olmayacaq.
Əlbəttə, Azərbaycanla Ermənistan arasında əldə olunan razılaşmada ən çox qazananlardan biri elə ABŞ oldu. Əks halda Tramp belə bir razılığın əldə olunmasına heç cəhd etməzdi.
Ağ Ev Cənubi Qafqazla bağlı razılaşmalardan nə qazandı? Birincisi, özünün Cənubi Qafqazdakı təsir imkanlarını artırdı. İkincisi, Rusiyanın bölgədəki “rıçak”ları maksimum dərəcədə zəiflədi. Üçüncüsü, Zəngəzur dəhlizinə nəzarəti təmin etdi. Beləliklə, ciddi siyasi və iqtisadi dividentlər qazandı. Dördüncüsü, Tramp özünün Nobel sülh mükafatına namizədliyi üçün əsas yaratdı.
Bundan başqa, rəsmi Vaşinqton lazım gələrsə Cənubi Qafqazdakı mövcud vəziyyətdən istifadə edərək həm Rusiyaya, həm də İrana təzyiqləri artıra bilər.
Yuxarıda qeyd olunan məqamlar deməyə əsas verir ki, ABŞ 8 avqust həmləsi ilə ən çox özü qazandı və Cənubi Qafqazda Rusiyaya qarşı mühüm gediş etdi. Sözsüz ki, Azərbaycan və Ermənistan da bu məsələdən qazanclı çıxdı.
Başqa sözlə desək, rəsmi Bakı İkinci Qarabağ müharibəsi dövründə olduğu kimi, indi də mövcud geosiyasi reallıq və ambisiyalardan öz xeyrinə istifadə etməyi bacardı.
Kənan Novruzov
09:19 19.08.2025
Oxunuş sayı: 9538
