Xarici xəbərlər

"Yeni hakimiyyətin barışıq cəhdləri səmimi deyil"

Koreya Xalq Demokratik Respublikası (KXDR) Cənubi Koreyanın yeni Prezidenti Li Çje Myonun zahirən barışıq yönümlü addımlarına baxmayaraq Seulla dialoqa getmək niyyətində olmadığını bəyan edib. Bu barədə Şimali Koreya lideri Kim Çen Inın bacısı, Koreya Əmək Partiyası Mərkəzi Komitəsinin rəhbər vəzifəlilərindən biri olan Kim Yo Çjon açıqlama verib.

Crossmedia.az xəbər verir ki, onun sözlərinə görə, Cənubi Koreyada hakimiyyət dəyişikliyindən sonra Pxenyana qarşı təbliğat xarakterli səsgücləndirici yayım dayandırılıb, Şimala vərəqələrin atılmasına son verilib və bəzi turistlərə KXDR ərazisinə keçidə icazə verilib.

Kim Yo Çjon vurğulayıb ki, Cənubi Koreya cəmiyyətində “sərtliyə sərtliklə cavab” dövrünün sona yetməsi və “yaxşılığa yaxşılıqla cavab” prinsipi ilə yeni bir əməkdaşlıq və barış dövrünün başlanması ilə bağlı çağırışlar artmaqdadır.

Bununla belə, Pxenyan hesab edir ki, Prezident Li Çje Myonun atdığı bu addımlar Cənubi Koreya rəhbərliyinin əsl mahiyyətini dəyişmir. Kim Yo Çjonun sözlərinə görə, Seul hələ də KXDR-i “udmaqla birləşmək” ideyasına aludə olub və ABŞ ilə müttəfiqliyə sadiq qalaraq qarşıdurma yönümlü siyasət yeridir.

Nigar Yahyazadə

🖨 Çap et

18:53 28.07.2025

Oxunuş sayı: 1094