“Ermənistan sülh istəyirsə Qərbi azərbaycanlıların geri dönüşünə şərait yaratmalıdır” - Deputat
Xankəndi şəhərində keçirilən İqtisadi Əməkdaşlıq Təşkilatının (İƏT) 17-ci Zirvə Görüşü, təkcə regional əməkdaşlıq baxımından deyil, həm də Azərbaycanın strateji hədəflərinə doğru atdığı ardıcıl və cəsur addımların təzahürü kimi yadda qaldı. Zirvə nəticəsində yayımlanan Xankəndi Kommunikesində Şərqi Zəngəzurun bərpası və Qərbi Azərbaycana Qayıdış Proqramının xüsusi qeyd olunması, ölkənin milli prioritetlərinin beynəlxalq səviyyədə qəbul gördüyünü nümayiş etdirir. Bu hadisə, Azərbaycanın post-münaqişə dövründə regionda sabitlik, inkişaf və ədalətin bərqərar olunması yolunda nə dərəcədə məqsədyönlü və iradəli siyasət yürütdüyünü bir daha təsdiqləyir.
Milli Məclisin deputatı Elnarə Akimova sözügedən sənədin əhəmiyyəti barədə Crossmedia.az-a danışıb: “Xankəndi şəhərində İqtisadi Əməkdaşlıq Təşkilatının (İƏT) 17-ci Zirvə görüşünün bizə qazandırdığı beynəlxalq nüfuzun miqyasları genişdir və zaman-zaman bu barədə danışılacaq. Kommunikedə həm şərqi Zəngəzurun iqtisadi cəhətdən dirçəlişi yüksək qiymətləndirilib, həm də Qərbi Azərbaycana qayıdış proqramı. Bu, belə də olmalı idi. Çünki görülən işlər də, haqq davamız da göz qabağındadır. İyulun 4-də İqtisadi Əməkdaşlıq Təşkilatının 17-ci Zirvə görüşündə bir çox mühüm məsələlərlə yanaşı Ermənistandan deportasiya olunmuş Qərbi azərbaycanlıların hüquqlarının təmin olunması məqamı üzərində də dayanıldı. Bildirildi ki, Qərbi azərbaycanlıların Ermənistandakı öz dədə-baba torpağına sülh yolu ilə qayıdışının təmin edilməsi sahəsində səylər bundan sonra da davam etdiriləcək. Bütün bunlar bir daha təsdiqləyir ki, Prezident İlham Əliyev mövqeyində qəti və güzəştsizdir, heç bir halda haqlı olduğu məsələdə geri addım atmır, səbr, səriştə və möhkəm iradə ilə yolun sonuna uğurla çatmağı, qalibiyyət bayrağını ən uca zirvələrdə dalğalandırmağı bacarır. Bu, əlbəttə ki, yalnız milli maraqlar məsələsi deyil, həm də insan hüquqlarının tanınması məsələsidir. Qərbi azərbaycanlılar əsrlərlə yaşadıqları dədə-baba torpaqlarından mərhələli şəkildə deportasiya olunub, əmlakları talan edilib, məscid və qəbiristanlıqları yerlə yeksan edilib. Onların qayıdış hüququ, BMT-nin İnsan Hüquqları Bəyannaməsi, Vətəndaş və Siyasi Hüquqlar Haqqında Pakt və Avropa İnsan Hüquqları Konvensiyası kimi nüfuzlu beynəlxalq sənədlərlə qorunur. Artıq bu məsələ beynəlxalq platformalarda da ciddi şəkildə gündəmdədir. Belə ki, İslam Əməkdaşlıq Təşkilatının son iclasında qəbul olunmuş “İstanbul Bəyannaməsi” Qərbi azərbaycanlıların qayıdış hüququnu dəstəkləyən ilk rəsmi beynəlxalq sənədlərdən biri kimi tarixə düşdü. Bu sənəddə Ermənistana açıq şəkildə çağırılır ki, Qərbi azərbaycanlıların hüquqlarını tanısın və onların geri dönüşünü təmin etsin”.
Deputat, həmçinin bildirib ki, Ermənistan regionda sülh və əməkdaşlıq istəyirsə, ilk növbədə, Qərbi azərbaycanlıların təhlükəsiz və hüquqi təminatlı şəkildə geri dönüşünə şərait yaratmalıdır: "Azərbaycan isə bu qayıdışın yalnız hüquqi çərçivədə və dinc yolla baş verməsini dəstəkləyir. Dövlətin bu sahədə həyata keçirdiyi “Qayıdış Konsepsiyası” da məhz sülhə, dialoqa və beynəlxalq hüquqa əsaslanan bir yanaşmanı təcəssüm etdirir. İnşaallah ki, Azərbaycan 30 illik işğalın sonucunda qazandığı zəfərdə olduğu kimi, bu məsələdə də lazım olan addımları atmağı bacaracaq”.
Ayhan
12:36 07.07.2025
Oxunuş sayı: 8847
