Azərbaycanın sutikinti müəssisəsi təşkilati-hüquqi formasını dəyişir
Ləğv olunmuş "Azərsu" ASC-nin "Sutikinti" Müəssisəsi adını və təşkilati-hüquqi formasını dəyişdiyini elan edib.
Crossmedia.az bu barədə İqtisadiyyat Nazirliyi yanında Dövlət Vergi Xidmətinin “Vergilər” qəzetinə istinadən xəbər verir.
Məlumata görə, müəssisə bundan sonra Azərbaycan Dövlət Su Ehtiyatları Agentliyinin tabeliyində olan İri Şəhərlərin Birləşmiş Su Təchizatı Xidmətinə məxsus "Sutikinti" MMC kimi fəaliyyət göstərəcək.
Azərbaycan Dövlət Su Ehtiyatları Agentliyi Prezident İlham Əliyevin 30 mart 2023-cü il tarixli fərmanı ilə su ehtiyatları, su təsərrüfatı və meliorasiya sahələrində idarəetməni təkmilləşdirmək, su ehtiyatlarından səmərəli istifadə etmək, torpaqların meliorasiyası və irriqasiyası işlərinin təşkilini yaxşılaşdırmaq məqsədilə Fövqəladə Hallar Nazirliyinin Su Ehtiyatları Dövlət Agentliyinin əsasında yaradılıb. “Azərsu” və "Azərbaycan Meliorasiya və Su Təsərrüfatı" ASC-lər əmlakları ilə birlikdə Agentliyin tabeliyinə verilib.
Hazırda Agentliyin tabeliyində İri Şəhərlərin Birləşmiş Su Təchizatı Xidməti ilə yanaşı, Regional Su Meliorasiya Xidməti, Su və Meliorasiya Elmi Tədqiqat İnstitutu, Tikilməkdə Olan Obyektlərin Müdriyyəti, Su və Meliorasiya Komplekslərinin Layihələndirilməsi İnstitutu, Agentliyin yanında isə Suların İstifadəsinə və Mühafizəsinə Dövlət Nəzarəti Xidməti fəaliyyət göstərir.
11:30 03.07.2025
Oxunuş sayı: 557
