Azərbaycan Polisi Günü: tarixdən gələn şərəfli yol
Müstəqillik hər bir millətin ruhunu yaşadan, onun varlığını təsdiqləyən ən ali dəyərlərdən biridir. Bu dəyərin qorunması, ictimai asayişin təmin olunması və dövlətçiliyin dayaqları üzərində möhkəmlənməsi isə hüquq-mühafizə orqanlarının, xüsusilə də polisin çiyinlərinə düşən müqəddəs vəzifələrdəndir. Azərbaycan polisi bu məsuliyyətli və şərəfli missiyanı artıq bir əsrdən çoxdur ki, ləyaqətlə daşıyır.
Polis tariximizin rəsmi təməli 1918-ci ilin 2 iyulunda, Azərbaycan Xalq Cümhuriyyətinin Daxili İşlər Nazirliyi tərkibində ilk polis qurumlarının yaradılması ilə qoyulmuşdur. Milli dövlətçiliyimizin təməlini atan AXC hökuməti öz mövcudluğunu təmin edə biləcək hüquq-mühafizə strukturlarının qurulmasına xüsusi diqqət yetirmişdi. O dövrdə yaradılan polis orqanları yalnız asayişin təminatçısı deyil, həm də müstəqil dövlətçiliyimizin ilk müdafiə qalalarından biri idi. Məhz bu səbəbdən 2 iyul tarixi 1998-ci ildən başlayaraq, ümummilli lider Heydər Əliyevin imzaladığı 710 nömrəli Fərman əsasında "Azərbaycan Polisi Günü" kimi rəsmi şəkildə qeyd olunur.
Qısa ömür sürmüş, lakin xalqımızın müstəqil dövlətçilik idealını gerçəkləşdirən AXC dönəmində yaradılmış polis orqanları sonrakı sovet işğalı dövründə də fəaliyyətini davam etdirdi. Sovet dövründə “milis” adlandırılan bu qurumlar 1991-ci ildə müstəqilliyimizin bərpasından sonra yenidən milli ruhla formalaşmağa başladı. Azərbaycan polisinin doğum günü, kökünü Cümhuriyyət dövründən alan 2 iyul tarixi idi. Bu səbəbdən də 1998-ci ildə Heydər Əliyev tərəfindən bu tarixi həqiqət rəsmi olaraq bərpa edildi. Bu qərar həm dövlətçilik tariximizə dərin ehtiram, həm də milli ənənəyə söykənən hüquq-mühafizə sisteminin təməl prinsiplərinin bir daha təsdiqi idi.
Bu gün Azərbaycan polisi yalnız cinayətkarlıqla mübarizə aparan deyil, eyni zamanda ölkənin təhlükəsizliyi, ictimai sabitliyi və vətəndaşların rifahı uğrunda çalışan güclü bir sistemə çevrilmişdir. Vətən müharibəsi dövründə polis orqanları Daxili Qoşunlarla birlikdə ön cəbhədə döyüşmüş, arxa cəbhədə isə asayişin təmin olunmasında, informasiya təhlükəsizliyinin qorunmasında, strateji obyektlərin müdafiəsində misilsiz xidmət göstərmişdir.
Müasir dövrdə Azərbaycan polisi həm də süni intellekt və rəqəmsal texnologiyalar dövrünün çağırışlarına cavab verən çevik, peşəkar və yüksək mənəvi-əxlaqi keyfiyyətlərə malik şəxslərdən ibarət güclü strukturdur. Onlar təkcə qanunun keşiyində durmurlar, həm də cəmiyyətin mənəvi dayaqlarından birinə çevrilmişlər.
Bu gün biz Azərbaycan Polisi Gününü qeyd edərkən, bir əsrdən çox tarixə malik bu şərəfli yolun hər mərhələsində şəhid olmuş, vətəni və xalqı naminə canından keçmiş polis əməkdaşlarımızı dərin hörmət və ehtiramla yad edirik. Onların fədakarlığı bu günün sabitliyi, xalqın rahatlığı və dövlətimizin əmin-amanlığı üçün atılmış möhkəm təməllərdir.
Azərbaycan polisi – tarixdən gələn güvən, bu günün gücü, sabahın təminatçısıdır!
13:12 02.07.2025
Oxunuş sayı: 800
