Nüvə dövləti olan qardaş Pakistanın Baş naziri Azərbaycana dəstəyə gəlir - Sizinləyik!
Pakistanın Baş naziri Şahbaz Şərifin iyulun 3-də Azərbaycana planlaşdırılan ikigünlük rəsmi səfəri dostluq və qardaşlıq münasibətlərimizin daha da möhkəmlənməsi baxımından mühüm əhəmiyyət daşıyır. O, Bakıda keçiriləcək İqtisadi Əməkdaşlıq Təşkilatının sammitində iştirak edəcək və səfər çərçivəsində iki ölkə arasında bir sıra əməkdaşlıq sazişlərinin və anlaşma memorandumlarının imzalanması nəzərdə tutulur. Bu səfər regional əməkdaşlığın dərinləşməsinə və Pakistan-Azərbaycan əlaqələrinin strateji səviyyəyə yüksəlməsinə təkan verəcək.
Mövzu ilə bağlı Milli Məclisin deputatı Elnarə Akimova fikirlərini Crossmedia.az-la bölüşüb: “Pakistanın Baş naziri Şahbaz Şərifin Azərbaycana növbəti səfəri bir neçə mühüm aspektdən strateji əhəmiyyət kəsb edir. Təbii ki, bu səfər təkcə iki dost və qardaş ölkə arasındakı ənənəvi yaxın münasibətlərin davamı deyil, həm də yeni regional və qlobal reallıqlar fonunda əməkdaşlığın dərinləşməsinə yönəlmiş mühüm diplomatik addımdır. Pakistan Azərbaycanın ərazi bütövlüyünü birmənalı şəkildə dəstəkləyən ölkədir. Bu səfər, Azərbaycanın 44 günlük Vətən müharibəsindən sonra regionda formalaşan yeni təhlükəsizlik və siyasi düzən fonunda Pakistanın mövqeyinin bir daha təsdiqlənməsi baxımından önəmlidir. Azərbaycan və Pakistan İslam Əməkdaşlıq Təşkilatı, Qoşulmama Hərəkatı və digər beynəlxalq platformalarda bir-birini daim dəstəkləyirlər. Bu səfər, qarşılıqlı diplomatik dəstəyin daha da möhkəmləndirilməsi baxımından önəmlidir”.
Deputat həmçinin bildirib: "Eyni zamanda Cənubi Qafqazda sabitlik, əməkdaşlıq və inteqrasiya meyllərinin gücləndirilməsi baxımından da diqqətçəkicidir. Pakistanın bu fəallığı Azərbaycanın regional liderliyini və beynəlxalq tərəfdaşlığını bir daha təsdiq edir. Bu gün xüsusilə nəqliyyat – Mərkəzi Asiyanı, Cənubi Asiyanı və Qafqazı birləşdirən yeni marşrutlar baxımından strateji əməkdaşlıqlara ehtiyac var. Yeni səfər ola bilsin ki, Azərbaycan və Pakistan arasında ticarət dövriyyəsini potensiala uyğun səviyyəyə gətirəcək. Energetika, kənd təsərrüfatı, nəqliyyat-logistika sahələrində konkret layihələr və sazişlərin imzalanması istisna edilmir. Bütün hallarda iki dost ölkənin yaxınlaşmasına xidmət edən bu səfər bütün aspektləri ilə faydalılıq və strateji davamlılıq vəd edir”.
Ayhan
18:32 01.07.2025
Oxunuş sayı: 535
