Ali məktəblərdə qeyri – ixtisas fənləri ləğv olunur? - Açıqlandı
Müasir təhsil sistemi yalnız konkret peşə biliklərinin ötürülməsi ilə kifayətlənməyib, insanın dünyagörüşünü, düşünmə qabiliyyətini və sosial bacarıqlarını da formalaşdırmağı qarşısına məqsəd qoyub. Məhz bu kontekstdə universitetlərdə tədris olunan qeyri-ixtisas fənləri – fəlsəfə, psixologiya, sosiologiya, etik dəyərlər, incəsənət tarixi və s. – mübahisəli mövzulardan biri olaraq qalır. Bəziləri bu fənləri tələbələrin intellektual inkişafına və geniş düşünmə bacarığına töhfə verən vacib komponentlər kimi qiymətləndirir. Digərləri isə onları vaxt itkisi, əsas ixtisas təhsilindən yayındıran maneə kimi görür. Bəs, doğrudanmı bu fənlər lazımdır? Yoxsa tələbələrin vaxtını alan, onların peşəkar inkişafına birbaşa təsir etməyən yüklərdən başqa bir şey deyil?
Mövzu ilə bağlı Milli Məclisin deputatı Ceyhun Məmmədov Crossmedia.az-a açıqlama verib:
“Düşünürəm ki, qeyri ixtisas fənnləri təsadüfən təhsil proqramlarına salınmayıb. Ona görə biz onların ləğvi üçün tələsməməliyik. Onların ləğvinə yönəlmiş hansısa qərarı da təsdiqləmirəm. Qeyri ixtisas fənnləri mülki müdafiə, ingilis dili kimi fənnlərdir. Onlar olmasa təhsil sistemində müəyyən çətinliklər yarana bilər. Yəni ixtisasa aid olmasa da, o fənnlər gələcəkdə gənclərin həyatında zəruri rol oynayır. Yəni qeyri- ixtisas fənnlərinin proqramdan çıxardılmasını düzgün hesab etmirəm. Bu məsələ çox ciddi və önəmli məsələdir. Bu fənnlər əvvəlcədən ciddi düşünülüb müzakirə edilərək proqramlara əlavə edilib. Təəssüf ki, son vaxtlar davamlı olaraq qeyri- peşəkar fikirlərin səsləndiyinin şahidi oluruq. Çox yaxşı olar ki, hər kəs öz bildiyindən danışsın”.
Ayhan Ağarzayev
18:41 24.06.2025
Oxunuş sayı: 847
