Aktauda I Azərbaycan-Qazaxıstan Yay Gənclər Məktəbi təşkil edilib
Qazaxıstanın Aktau şəhərində Diasporla İş üzrə Dövlət Komitəsinin dəstəyi, “Azərbaycan Mərkəzi” İctimai Fondunun təşkilatçılığı ilə "Azərbaycan və Qazaxıstan: Konstitusiya və Suverenlik ilində əlaqələrin möhkəmləndirilməsi" adlı I Azərbaycan-Qazaxıstan Yay Gənclər Məktəbi təşkil edilib.
Dövlət Komitəsindən Crossmedia.az-a bildirilib ki, Azərbaycan, Qazaxıstan və digər türk dövlətlərindən ümumilikdə 40 dinləyici konstitusiya quruculuğu, suverenlik tarixi, mədəniyyətlərarası dialoq sahələrində təcrübə və bilik mübadiləsi aparmaq imkanı qazanıblar. Düşərgədə Azərbaycandan gedən alimlər - Eldar Cəfərov (Bakı Dövlət Universiteti) və Elvin Talışinski (Azərbaycan Universiteti) də iştirak ediblər.
Yay məktəbinin proqramına seminarlar, məşğələlər, həmçinin Abiş Kekilbayevin adını daşıyan muzeyə ziyarət və dəniz ekskursiyası daxil olub.
Bağlanış mərasimində Azərbaycan, Türkiyə, Özbəkistan və Türkmənistanın baş konsulları iştirak ediblər.
"Azərbaycan Mərkəzi"nin direktoru İlkin Orucov Yay məktəbinin işinin yekunlarını açıqlayıb, məktəbin gənclər arasında əməkdaşlığın inkişafına və Azərbaycanla Qazaxıstanın qardaşlıq əlaqələrinin möhkəmlənməsinə verdiyi töhfədən bəhs edib.
Yay məktəbinin uğurla keçirilməsindən məmnunluğunu bildirən Azərbaycanın Aktaudakı baş konsulu Ayxan Süleymanlı təhsil və mədəniyyət sahələrində əməkdaşlığın daha da inkişaf etdirilməsinə hazır olduğunu vurğulayıb.
Yesenov Universitetinin nümayəndəsi Elvira Canqojaeva universitetin bazasında belə tədbirlərin keçirilməsinin vacibliyini diqqətə çatdırıb, "Azərbaycan Mərkəzi" ilə əməkdaşlığın davam etdirilməsinə ümidvar olduğunu qeyd edib.
Ölkələr arasında əlaqələrin möhkəmlənməsində gənclərin vacib rolundan danışan Diasporla İş üzrə Dövlət Komitəsinin nümayəndəsi Sabit Məmmədov Yay məktəbinin iştirakçılarına və təşkilatçılarına təşəkkür edib.
"Dostluq" Etno-mədəni Birliyinin sədri Şəmsəddin Hüseynov Azərbaycan və Qazaxıstan arasında iqtisadi əməkdaşlığın inkişafının və bu prosesdə gənclərin rolunun vacibliyindən danışıb.
Sonra iştirakçılara sertifikatlar təqdim edilib.
Tədbir bədii hissə ilə başa çatıb.
17:20 18.06.2025
Oxunuş sayı: 410
