Gürcüstanda ilk dəfə Azərbaycan dili üzrə Regional Olimpiada keçiriləcək
Gürcüstanda azərbaycandilli məktəblərin şagirdləri arasında ilk dəfə Azərbaycan dili üzrə I Regional Olimpiada keçiriləcək.
Bu barədə Crossmedia.az-a Diasporla İş üzrə Dövlət Komitəsindən bildirilib.
“Maarif” təşkilatının rəhbəri, gənc fəal Aygül İsayeva ölkədəki azərbaycandilli 116 məktəbdə seçim turlarının keçirilidiyini və 105 şagirdin yekun tura vəsiqə qazandığını bildirib.
Yekun tur Marneuli şəhərindəki Azərbaycan Evində Azərbaycan Respublikasının Diasporla İş üzrə Dövlət Komitəsinin dəstəyi və Gürcüstan Azərbaycanlılarının İnteqrasiya Mərkəzinin təşkilatçılığı ilə baş tutacaq.
Olimpiadanın əsas məqsədi məktəblilər arasında Azərbaycan dilinə marağın artması, ana dilimizin qorunması, inkişafı və gələcək nəsillərə ötürülməsidir. Eyni zamanda, şagirdlərə dil bilikləri ilə yanaşı, yazılı və şifahi ünsiyyət bacarıqlarını nümayiş etdirmək imkanı yaradılacaq.
Qeyd edək ki, bu cür tədbirlər Gürcüstanda yaşayan azərbaycanlıların milli kimliyinin qorunmasına, ana dilində təhsilin təşviqinə və ictimai inteqrasiyanın güclənməsinə xidmət edir.
10:13 16.06.2025
Oxunuş sayı: 10246
