Elm və təhsil
MEK əməkdaşları Gəncədə keçirilən beynəlxalq elmi konfransda çıxış ediblər
Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) Kitabxana işləri üzrə direktor müavini fil.ü.f.d., dosent Şəhla Quliyeva və Komplektləşdirmə şöbəsinin müdiri Gülnar Məmmədova Gəncədə keçirilən “Azərbaycan və dünya nizamişünaslığının aktual problemləri” mövzusunda beynəlxalq elmi konfransa qatılaraq məruzə ilə çıxış ediblər.
Crossmedia.az xəbər verir ki, AMEA-nın Gəncə Bölməsinin təşkilatçılığı ilə böyük ədəbiyyatşünas alim, Əməkdar elm xadimi, “Şöhrət” ordenli professor Xəlil Yusiflinin anadan olmasının 90 illiyinə həsr edilmiş beynəlxalq elmi konfransa yerli və xarici alimlər, tədqiqatçılar qatılıb.
Plenar iclasda Ş.Quliyeva MEK-in direktoru texnika elmləri doktoru Hüseyn Hüseynov ilə həmmüəlif olduğu “AMEA-nın Mərkəzi Elmi Kitabxanasının fondlarında qorunan Nizami Gəncəvi irsinin dünya dillərindəki bəzi nümunələri” adlı məruzə ilə çıxış edib və dahi mütəfəkkirin anadan olmasının 880 illiyi münasibətilə MEK tərəfindən tərtib olunmuş biblioqrafik göstəricini Bölmənin Nizami Gəncəvi Mərkəzinə hədiyyə olaraq təqdim edib.
Panel iclasında isə G.Məmmədovanın “Xəlil Yusiflinin Azərbaycan Milli Elmlər Akademiyasının Mərkəzi Elmi Kitabxanasında irsi”nə dair çıxışı dinlənilib.
Sonda məruzəçilərə sertifikatlar təqdim olunub.
22:37 12.06.2025
Oxunuş sayı: 1918
