Krivoy Roqda 28 May – Müstəqillik Günü qeyd edilib
Ukraynanın Krivoy Roq şəhərində Diasporla İş üzrə Dövlət Komitəsinin dəstəyi ilə 28 May - Müstəqillik Gününə həsr olunan tədbir keçirilib.
Bu barədə Crossmedia.az-a Diasporla İş üzrə Dövlət Komitəsindən məlumat verilib.
Bildirilib ki, şəhər merinin vəzifələrini icra edən Yuriy Vilkul, şəhər radasının deputatları, ictimaiyyət nümayəndələri və diaspor fəalları tədbirdə iştirak ediblər.
İştirakçılar öncə Azərbaycan-Ukrayna dostluğuna aid sərgiyə baxıblar.
Yuriy Vilkul bu əlamətdar gün münasibətilə soydaşlarımızı təbrik edib. Krivoy Roq şəhəri “Azərbaycan Diasporu” təşkilatının 3 əməkdaşına meriyanın təşəkkürnamələri təqdim olunub. Təşkilat tərəfindən isə Yuriy Vilkula Azərbaycan xalçası hədiyyə verilib.
Ukraynanın Krivoy Roq şəhəri “Azərbaycan Diasporu” təşkilatının rəhbəri Kamaləddin Ağayev isə öz çıxışında müstəqillik tariximizdən və onun əhəmiyyətindən danışıb.
Tədbir saz havalarının, Azərbaycan milli rəqslərinin və Qara Qarayevin “İldırımlı yollarla” baletindən musiqilərin ifa edildiyi bədii proqramla başa çatıb.
15:13 03.06.2025
Oxunuş sayı: 994
