Türk Akademiyası Sadıq bəy Ağabəyzadənin elmi irsini təqdim edir
Krakovda (Polşa) məşhur türk şərqşünası Sadıq bəy Ağabəyzadənin anadan olmasının 160 illiyinə həsr olunmuş beynəlxalq elmi tədbir və sərginin açılışı olub. Crossmedia.az Türk Akademiyasının mətbuat xidmətinə istinadla xəbər verir ki, beynəlxalq tədbirdə Polşa, Azərbaycan, Türkiyə və digər ölkələrdən diplomatik missiyaların nümayəndələri, alimlər, türkoloqlar və şərqşünaslar iştirak ediblər.
Türk Akademiyasının prezidenti Şahin Mustafayev çıxışında Sadıq bəy Ağabəyzadəni cəmiyyətin müasirləşməsində, şərqşünaslığın və maarifçilik hərəkatının inkişafında mühüm rol oynamış XIX əsrin sonu - XX əsrin əvvəlləri Azərbaycan ziyalıları nəslinin parlaq nümayəndəsi kimi təqdim edib. O, elmi-mədəni irsin türk və Avropa elmi məkanının qarşılıqlı əlaqəsi kontekstində əhəmiyyətini vurğulayıb.
Akademiyanın prezidenti qeyd edib ki, qurum belə görkəmli şəxsiyyətlərin irsinin öyrənilməsinə və təbliğinə böyük önəm verir, onların əsərlərinin yenidən nəşri, türk və dünya elminə verdiyi töhfələrin akademik şəkildə dərk edilməsi istiqamətində layihələr həyata keçirir.
Elmi və mədəni əməkdaşlığın gücləndirilməsi əlaməti olaraq Türk Akademiyasının prezidenti Yagellon Universitetinin Şərqşünaslıq İnstitutunun kitabxanasına Sadıq bəy Ağabəyzadənin təkrar nəşrini - ilk dəfə 1904-cü ildə Aşqabadda dərc edilmiş “Trans-Xəzər vilayəti türkmənlərinin atalar sözləri və məsəlləri toplusunun əlavəsi ilə Türkmən ləhcəsi Dərsliyi” hədiyyə edib.
Müəllifin anadan olmasının 160 illiyinə Türk Akademiyası tərəfindən yenidən nəşr edilən kitab, türkmən dilinin qrammatikasının ilk sistemli təsviri və türk dilçilik ənənəsinin ən mühüm abidəsidir. Bundan əlavə, Ş.Mustafayev kitabxanaya Türk Akademiyasının hazırladığı digər nəşrləri də hədiyyə edib.
Sadıq bəy Ağabəyzadənin şərqşünaslığın inkişafında əhəmiyyətli rolu, Azərbaycanın mədəni və elmi həyatına verdiyi töhfələri, habelə mühacirətdəki taleyinin aspektləri seminar iştirakçılarının çıxışlarında öz əksini tapmışdır.
Polşanın bir çox görkəmli türkoloqları onun tələbələri olmuşdur. Ağabəyzadə 1944-cü ildə Lvovda vəfat edib.
Tədbir görkəmli şərqşünas alimin həyat yolunu və elmi irsini ətraflı açan zəngin arxiv materialları və sənədləri təqdim edən “Sadıq bəy (1865-1944). İki xalqın xidmətində” adlı sərgi ilə başa çatıb.
08:43 01.06.2025
Oxunuş sayı: 1477
