“İmtahan suallarının qoyuluşu bu istiqamətlər üzrə müəyyənləşir” - EKSPERT
Hər il keçirilən qəbul imtahanları minlərlə abituriyentin həyatında həlledici rol oynayır. Lakin imtahan suallarının səviyyəsi və məzmunu ilə bağlı narazılıqlar demək olar ki, hər imtahan sessiyasında müzakirə mövzusuna çevrilir. Bu il də istisna olmadı — bir çox abituriyent və valideynlər sualların çətinliyindən, proqramdan kənar mövzuların yer almasından və qiymətləndirmənin ədalətli aparılmamasından şikayət ediblər. Bəzi abituriyentlər imtahanların onların real bilik səviyyəsini əks etdirmədiyini bildirərək Dövlət İmtahan Mərkəzinin (DİM) hazırladığı suallara etiraz edirlər.
Mövzu ilə bağlı təhsil eksperti Rəşad Qardaşoğlu Crossmedia.az-a verdiyi açıqlamada bildirib:
“İmtahan suallarının qoyuluşu, onların cavablandırılması hər zaman 3 əsas istiqamət üzrə müəyyənləşdirilir. Bu istiqamətlər sualların asan, orta və çətin səviyyədə olmasıdır. İndiyə qədər heç vaxt çətin sualların üstünlük təşkil etməsi müşahidə edilməyib. Bütün fənnlər və predmetlər üzrə suallar ortaq nəticəyə gəlir - asan, orta, çətin. Nə sualların hamsı asan ola bilməz, nə orta, nə də çətin. O ki, qaldı zaman keçdikcə sualların təsnifatına baxanda onların kəmiyyət, keyfiyyət etibarilə xarakterizə edəndə, müəyyən suallar yaranır ki, “bu il daha çətin idi, keçən il daha asan, gələn il necə olacaq?”. Bəzi fənnlər dövrün tələbinə uyğun olaraq yenilik tələb edir ki, bu da özünü suallarda göstərir. Lakin bəzi fənnlər də var ki, onlarda yenilik yoxdur və stabil metodikası var. Bu gün kurikulum ilə daha çox tətbiqə önəm verildiyi üçün sualların qoyuluşunda da abituriyentlərdən bu tələb olunur. Bu da bir az fərqlilik yaradır. Ümumi dinamikaya və illər üzrə təsnifata bölsək imtahan o qədər də çətin deyildi. Sadəcə dərsin tədrisində olan fərqliliklər sualların çətin görünüşünə gətirib çıxarır”.
Ayhan Ağarzayev
13:13 30.05.2025
Oxunuş sayı: 1002
