Mehriban İmanova Riyadda keçirilən beynəlxalq elmi tədbirdə iştirak edib
Azərbaycan Elm Fondunun İcraçı direktoru Mehriban İmanova Riyadda keçirilən beynəlxalq elmi tədbirdə yüksək səviyyəli görüşlər keçirib.
2025-ci il may ayının 18-dən 22-dək Səudiyyə Ərəbistanının paytaxtı Ər-Riyadda keçirilmiş Qlobal Tədqiqat Şurasının (Global Research Council – GRC) 13-cü İllik Toplantısı çərçivəsində Azərbaycan Elm Fondunun İcraçı direktoru Mehriban İmanova ölkəmizi təmsil edərək bir sıra vacib beynəlxalq görüşlərdə iştirak etmişdir.
Tədbir Kral Əlahəzrət Feysəl bin Bəndər bin Əbdüləzizin yüksək himayəsi altında keçirilmiş, elmin və tədqiqatların qlobal idarəedilməsi məsələlərini müzakirə etmək üçün 50-dən çox ölkənin tədqiqat şuralarının rəhbərləri bir araya gəlmişdir.
Mehriban İmanova tədbir çərçivəsində Kral Abdulaziz adına Elm və Texnologiyalar Şəhərinin Prezidenti, Almarai Elmi Yaradıcılıq Mükafatının Müşahidə Şurasının sədri və GRC İdarə Heyətinin sədr müavini olan cənab Munir M. Eldesouki ilə görüş keçirmişdir. Görüşdə elmi fəaliyyətin təşkili, elmi fondların institusional inkişafı və texnologiya transferi sahəsində əməkdaşlıq imkanları geniş şəkildə müzakirə olunmuşdur. Tərəflər, eyni zamanda, gələcəkdə birgə çağırışların elan edilməsi və innovasiya layihələrinin dəstəklənməsi üçün mexanizmlərin işlənib hazırlanmasına dair razılıq əldə etmişlər.
Mehriban İmanova həmçinin Türkiyə Elmi və Texnoloji Araşdırmalar Qurumu – TÜBİTAK-ın Prezidenti cənab Orxan Aydın ilə də ikitərəfli görüş keçirmişdir. Görüş zamanı iki qardaş ölkənin elmi qurumları arasında strateji əməkdaşlığın dərinləşdirilməsi, birgə simpoziumlar, qrant proqramları və gənc alimlərin birgə təlimləri müzakirə edilmişdir. Cənab Orxan Aydın Azərbaycan Elm Fondunun son illərdəki fəaliyyətini yüksək qiymətləndirmiş, fondun çevik idarəetmə modelini və beynəlxalq açıq çağırışlarda iştirakını nümunə göstərmişdir.
Əhəmiyyətli görüşlərdən biri də Kanadanın Təbii Elmlər və Mühəndislik üzrə Tədqiqatlar Şurasının (NSERC) Prezidenti və GRC İdarə Heyətinin Sədri olan professor Alejandro Adem ilə olmuşdur. Görüşdə Azərbaycanın elmi icmasının beynəlxalq elmi ekosistemə daha sıx inteqrasiyası, qarşılıqlı tədqiqat qruplarının formalaşdırılması və məlumat mübadiləsinin sürətləndirilməsi məsələləri ətraflı müzakirə edilmişdir. Professor Adem Azərbaycanın elm idarəçiliyindəki müasirləşmə təşəbbüslərini təqdir etmiş və gələcəkdə Kanadada birgə proqramların təşkili imkanlarını açıq şəkildə ifadə etmişdir.
Riyad səfəri çərçivəsində Mehriban İmanova həmçinin Latviya Elmi Şurasının Xarici Əlaqələr üzrə rəhbəri Dr. Elita Zondaka ilə də görüş keçirmişdir. Görüşdə Azərbaycanın və Latviyanın elmi qurumları arasında mövcud əməkdaşlıq imkanları, Avropa elmi çağırışlarında birgə iştirak və regional tədqiqat təşəbbüslərinin dəstəklənməsi məsələləri ətraflı müzakirə olunmuşdur. Dr. Zondaka Latviya Elmi Şurasının açıq elmi siyasəti, tədqiqatçı mobilliyi və Horizon Europe proqramındakı iştirak təcrübəsi haqqında məlumat vermişdir. Tərəflər gələcəkdə ortaq layihələr və elmi təcrübə mübadiləsi imkanlarının araşdırılmasına dair razılıq əldə etmişlər.
Tədbir çərçivəsində Azərbaycan Elm Fondunun İcraçı direktoru Mehriban İmanova həmçinin Oman Sultanlığının Təhsil, Elmi Tədqiqat və İnnovasiya Nazirliyinin Tədqiqat və İnnovasiyalar üzrə Müavini Dr. Saif Abdullah Al Haddabi ilə də görüş keçirmişdir. Görüşdə Azərbaycan və Oman arasında elmi və texnoloji əməkdaşlığın inkişaf etdirilməsi, bilik və təcrübə mübadiləsinin təşkili, elmi startapların və innovasiya ekosistemlərinin qarşılıqlı dəstəklənməsi imkanları müzakirə olunmuşdur.
Qeyd edək ki, Fondun İcraçı direktoru Dr. Mehriban İmanova Avropa regionu üzrə Qlobal Tədqiqat Şurasının rəsmi platformasında Elmi Tədqiqat Şuralarının rəhbərləri sırasına daxil edilmişdir.
13:26 23.05.2025
Oxunuş sayı: 13293
