DSMF beynəlxalq müsabiqədə iki mükafata layiq görülüb
Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondu (DSMF) Amerika Birləşmiş Ştatlarında yerləşən “World Economic Magazine” beynəlxalq maliyyə təhlili platformasının “World Economic Magazine Awards 2025” müsabiqəsində uğur qazanıb.
Crossmedia.az Nazirliyin İctimaiyyətlə əlaqələr şöbəsinə istinadən məlumat verir ki , DSMF müsabiqədə “Ən Yaxşı Pensiya Fondu” mükafatına və sosial təminat sahəsində Mükəmməllik Mükafatına layiq görülüb.
Üç mərhələdən ibarət olan müsabiqədə Fond Azərbaycanda əlilliyi olan şəxslər üçün inklüziv xidmətlərə rəqəmsal çıxış imkanlarının yaradılması və ünvanlı sosial yardım təyinatı üçün vahid reyestrə aid müsabiqə işləri ilə iştirak edib.
Hər mərhələdə müsabiqə işi münsiflər tərəfindən yüksək balla qiymətləndirilib və DSMF-nin adı müsabiqənin qaliblərinin siyahısına daxil edilib.
Builki müsabiqədə DSMF ilə yanaşı, Argentina, Avstraliya, Belçika, Braziliya, Misir, Qətər, BƏƏ, Qırğızıstan, Monako, İtaliya, Malayziya, Səudiyyə Ərəbistanı, Sinqapur və digər ölkələrin dövlət və özəl qurumları innovativ yanaşma və nailiyyətlərini beynəlxalq miqyasda tanıtmaq imkanı əldə ediblər.
11:46 05.05.2025
Oxunuş sayı: 8769
