Azərbaycan Malayziyada keçirilən beynəlxalq festivalda təmsil olunub
Malayziyanın paytaxtı Kuala Lumpur şəhərində yerləşən “The International School of Kuala Lumpur”da təşkil olunan “Beynəlxalq Gün” festivalında Azərbaycan da iştirak edib.
Crossmedia.az xəbər verir ki, festivalda Azərbaycanla yanaşı, Braziliya, Malayziya, Sinqapur, İtaliya, Yaponiya, Norveç, Venesuela, Hindistan, Çin, Kanada, ABŞ, Portuqaliya, Yəmən, Cənubi Koreya, Misir, Mərakeş, Tailand, Kolumbiya, Vyetnam və İndoneziya kimi ölkələrin nümayəndələri təmsil olunublar.
Tədbirdə övladları həmin məktəbdə təhsil alan Azərbaycan icmasının fəalları Nərminə Cabbarova və Aygün Bapnanın təşəbbüsü ilə yaradılmış Azərbaycan guşəsində ölkəmizin tarixi, mədəniyyəti, milli adət-ənənələri və mətbəxini əks etdirən suvenirlər, kəlağayılar və müxtəlif milli təamlar nümayiş etdirilib.
Guşəyə maraq göstərən ziyarətçilərə Azərbaycan haqqında geniş məlumat verilib, suallar cavablandırılıb və milli yeməklərlə qonaq ediliblər.
Qeyd edək ki, diaspor təşkilatlarının və fəallarının bu kimi beynəlxalq tədbirlərdə iştirakı Azərbaycan mədəniyyətinin xaricdə tanıdılması, dostluq əlaqələrinin inkişafı və mədəniyyətlərarası anlayışın təşviqi baxımından xüsusi əhəmiyyət daşıyır.
18:55 16.04.2025
Oxunuş sayı: 13434
