Abbas Abbasov: BTQ müstəmləkə və neokolonializm rejimi altında yaşayan xalqların müstəqillik uğrunda mübarizələrinə daim dəstək verir
2023-cü ilin iyul ayında Qoşulmama Hərəkatının nazirlər toplantısında təsis olunmuş Bakı Təşəbbüs Qrupu (BTQ) müstəmləkə əsarəti və neokolonializm rejimi altında yaşayan xalqların azadlıq və müstəqillik uğrunda mübarizələrinə daim və qətiyyətlə dəstək verir, həmrəyliyi və praktiki yardımı özünə öhdəlik kimi qəbul edir. Bu sözləri Bakı Təşəbbüs Qrupunun icraçı direktoru Abbas Abbasov BMT-nin Afrika Əsilli Xalqların Daimi Forumunun 4-cü sessiyasında çıxışı zamanı deyib. O bildirib ki, Afrika və Afrika mənşəli xalqlar da müstəmləkəçiliyin törətdiyi faciələrdən kənarda qalmayıb.
Abbas Abbasovun sözlərinə görə, yaşamaq, azadlıq, bərabərlik, mədəni kimlik və dekolonizasiya hüquqları imtiyaz deyil. “Bunlar BMT Nizamnaməsində, Qoşulmama Hərəkatının Bandunq prinsiplərində və digər bir çox beynəlxalq sənədlərdə təsbit olunmuş ümumbəşəri insan hüquqlarıdır. Buna baxmayaraq, bir çox Afrika ölkələri və Afrika mənşəli insanlar üçün bu hüquqlar hələ də reallıqdan çox arzu olaraq qalmaqdadır. Son iki il ərzində təşkilatımız təxminən 30 beynəlxalq konfransa ev sahibliyi edib”,- deyə o əlavə edib.
Təşəbbüs Qrupunun icraçı direktoru əlavə edib ki, müstəmləkəçilik irsinin sadalanan mənfi təsirləri hələ də müstəmləkə siyasətindən əziyyət çəkən Qvadelup, Martinik, Boneyra, Sen Martin, Kanaki (Yeni Kaledoniya), Maohi Nui (Fransız Polineziyası), Fransız Qvianası, Reyunyon, Mayot, Korsika və digər ərazilərdən olan müstəqillik hərəkatlarının nümayəndə və liderlərini, dekolonizasiya üzrə ekspertləri və tədqiqatçıları bir araya gətirib: “Bu gün biz burada yalnız tarixi müzakirə etmirik, həm də gələcəyi formalaşdırırıq. Bu forum tarixən kənarda qalmış Afrika mənşəli xalqların səslərinin qlobal miqyasda eşidilməsi üçün mühüm bir platformadır”.
Abbas Abbasov forum çərçivəsində Bakı Təşəbbüs Qrupunun “Dekolonizasiya: Sakit İnqilab” adlı yan tədbir təşkil edəcəyini bildirib və iştirakçıları konfransa dəvət edib. O sonda əlavə edib ki, bu mübarizə təkcə keçmişin səhvlərini üzə çıxarmaq üçün deyil, daha ədalətli, daha inklüziv və insan hüquqlarına hörmət edən bir gələcəyin qurulmasına yönəlib. (Azərtac)
06:30 15.04.2025
Oxunuş sayı: 6706
