Azərbaycan nümayəndə heyəti Srebrenitsa soyqırımı qurbanlarının xatirəsini anıb
Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasının nümayəndə heyəti Bosniya və Herseqovinaya səfər çərçivəsində Potoçari şəhərində yerləşən Srebrenitsa Memorial Mərkəzində olub.
Crossmedia.az xəbər verir ki, komissiyanın katibi Qəzənfər Əhmədov, nümayəndə heyətinin üzvləri Zaur İsmayılov və Nicat Bədəlzadə, Azərbaycanın Bosniya və Herseqovinadakı səfirliyinin birinci katibi Emil Ağayev xatirə abidəsinin önünə əklil qoyub, Srebrenitsa soyqırımı qurbanlarının xatirəsini yad ediblər. Bosniya və Herseqovina İtkin Şəxslər İnstitutunun idarə heyətinin üzvü Saliha Cuderija Azərbaycan nümayəndə heyətini müşayiət edib.
Anım mərasimindən sonra nümayəndə heyəti Memorial Mərkəzi ziyarət edib və burada daimi fəaliyyət göstərən sərgilərə, sonra isə Tuzla şəhərində Podrinye İdentifikasiya Mərkəzinin işi ilə tanış olub. Mərkəzin məhkəmə antropoloqu Draqana Vuçetiç nümayəndə heyətinə Bosniya və Herseqovinada soyqırımı qurbanlarının ekshumasiyası, identifikasiyası və qalıqlarının yenidən birləşdirilməsi proseslərinin tarixi və həyata keçirilən prosedurlar haqqında təqdimat verib.
Azərbaycan nümayəndə heyətinin 3 günlük səfəri çərçivəsində Bosniya və Herseqovina İtkin Şəxslər İnstitutu ilə Dövlət Komissiyası arasında əməkdaşlığın gücləndirilməsi istiqamətində ilkin razılıq əldə edilib. Çünki hər iki ölkə itkin düşmüş şəxslərin qalıqlarının axtarışı ilə bağlı problemlərlə üzləşir.
İnstitutda keçirilən görüşdə tərəflərin səlahiyyətli orqanlarının kütləvi məzarlıqların yerləri haqqında məlumat çatışmazlığı ilə üzləşdiyi vurğulanıb. İtkin düşmüş şəxslərin axtarışı, ekshumasiya, identifikasiya və məlumat bazalarının yaradılması prosesində qazanılmış təcrübə və biliklərin mübadiləsinin müstəsna əhəmiyyət daşıdığı qeyd olunub.
Azərbaycan Respublikasında Ermənistanla münaqişə nəticəsində 3983 nəfər itkin düşüb, Bosniya və Herseqovinada isə hələ də 7608 qurban axtarılır. Bosniya və Herseqovinada indiyə qədər 25 mindən çox qurbanın qalıqları identifikasiya edilərək ailələrinə təhvil verilib, Azərbaycanda isə 688 şəxsin qalıqları ekshumasiya olunub və 167 qurbanın qalıqları identifikasiya edilərək ailələrinə təhvil verilib.
18:11 12.04.2025
Oxunuş sayı: 1294
