Taksi sürücülərinin yarıdan çoxu 8 saatdan çox işləyir - SORĞU
Sosial Tədqiqatlar Mərkəzi tərəfindən Bakı və Abşeron ərazisində taksi fəaliyyəti ilə bağlı sosioloji sorğu keçirilib.
Crossmedia.az xəbər verir ki, sorğu nəticələrinə görə, taksi sürücülərinin əksəriyyəti gənc və orta yaşlı insanlardır. Onların 54.6%-i 35 yaş və ondan aşağı, 27.5%-i 36-45 yaş, 12.3%-i 46-55 yaş, 5.7%-i isə 56-65 yaş qrupuna aiddir.
Sürücülərin 69.0%-i son 5 ildə bu sahədə çalışır, 54.9%-i isə son 3 ildə fəaliyyətə başlayıb ki, bu da sahəyə yeni daxil olanların üstünlük təşkil etdiyini göstərir.
Taksi sürücülərinin əməkdaşlıq etdiyi şirkətlər arasında “Bolt” (75.9%), “Uber” (49.2%) və “Yango” (16.9%) üstünlük təşkil edir. Gündəlik iş saatlarına gəldikdə isə sürücülərin yarıdan çoxu 8 saatdan çox işləyir.
Taksi fəaliyyəti onların 81.8%-nin əsas məşğulluq sahəsidir, 17.7%-i isə bu işi əlavə məşğuliyyət kimi görür.
Bu fəaliyyətlə məşğul olanların avtomobillərinin 47.2%-i hibrid, 32.6%-i benzin, 19.4%-i dizel mühərrikli, 0.8%-i isə qazla işləyir. Elektromobil istifadəçilərinə rast gəlinməyib. Sürücülərin 45.6%-i şəxsi avtomobilindən istifadə edir, 30.5%-i isə avtomobili icarəyə götürür.
Bakı və Abşeron sakinlərinin arasında keçirilmiş rəy sorğusuna əsasən, 77.7%-i avtobusdan, 75.3%-i taksidən, 59.7%-i metrodan, 6.2%-i şəhərətrafı dəmiryolundan istifadə edir.
Bu ərazidə yaşayan respondentlərin 9.3%-i taksi xidmətlərindən gündəlik olaraq, 30.7%-i həftədə bir neçə dəfə, 57.6%-i ayda bir neçə dəfə istifadə etdiyini bildirib.
Avtobus xidmətlərinin hazırkı vəziyyəti respondentlərin 57.7%-ni qane etmir. Taksi xidmətlərindən istifadə edənlərin 65.2%-i isə bu xidməti rahat və sürətli olduğu üçün seçir.
Taksi xidmətlərindən istifadə edərkən, sərnişinlərin 41.0%-i taksi minik avtomobilinin vəziyyətinin qənaətbəxş olmaması, 36.9%-i sürücünün telefondan istifadə etməsi, 30.7% sürücünün siqaret çəkməsi, 22.4%-i sürücü mədəniyyətinin aşağı olması, 20.0%-i yol hərəkəti qaydalarını pozması, 20.0%-i yüksək səslə musiqi dinləməsi, 19.7%-i ödəniş qalığını qaytarmaması, 15.5%-i qeyri-etik davranışı halları ilə mütəmadi qarşılaşdığını bildirib.
Qeyd edək ki, tədqiqat kəmiyyət metodologiyası əsasında olmaqla iki mərhələdə aparılıb. Sosioloji sorğunun hədəf qrupu kimi, ilk mərhələdə Bakı və Abşeron ərazisində taksi fəaliyyəti ilə məşğul olan 390 nəfər əhatə olunub. Hədəf qrup üzrə respondentlərin müəyyən olunmasında qartopu üsulu tətbiq edilib. İkinci mərhələdə sosioloji sorğunun hədəf qrupu Bakı və Abşeronda yaşayan əhali müəyyən edilib. Seçmə çərçivəsinə daxil edilən 390 nəfərin müəyyən olunmasında ehtimallı seçmə üsulundan istifadə olunub. Seçmə çərçivəsi əhalinin paylanmasına proporsional müəyyən edilib, gender bərabərliyi qorunub.
İlk mərhələ üzrə məlumatların toplanılması 2024-cü ilin 2 aprel - 8 aprel tarixlərində, ikinci mərhələ üzrə 9 aprel - 15 aprel tarixləri arasında kompüter dəstəkli telefonla müsahibə üsulundan (CATI) istifadə edilməklə həyata keçirilib.
Bildirək ki, sorğular hər iki qrup üzrə 18 yaş və ondan yuxarı ümumilikdə 780 nəfəri əhatə edib. Sorğuda əhatə olunmuş respondent sayına əsasən, nəticələrin hər iki qrup üzrə xəta əmsalı 95% əminlik intervalında 5%-ə bərabər olub.
Nəzrin Salmanova
12:16 11.04.2025
Oxunuş sayı: 1209
