Azərbaycan Türkiyə və İsrail arasında yenidən vasitəçi ola bilərmi?
Türkiyə və İsrail Xarici İşlər Nazirlikləri arasında sosial şəbəkələrdə yaşanan qarşılıqlı ittihamlar fonunda iki ölkə arasında yeni dialoq mərhələsi başlayıb. Bu prosesin ən diqqətçəkən məqamlarından biri isə görüşlərin Azərbaycan vasitəçiliyi ilə Bakıda baş tutmasıdır.
Crossmedia.az xəbər verir ki, bu barədə BBC məlumat yayıb.
Belə ki, bu inkişaf ABŞ Prezidenti Donald Trampın İsrailin Baş naziri Benyamin Netanyahu ilə Ağ Evdə keçirdiyi görüşdən bir neçə gün sonra baş verib. Trampın bu görüşdə Türkiyə ilə İsrail arasındakı problemlərin həlli üçün vasitəçilik təklifi irəli sürdüyü qeyd olunub.
Qeyd olunub ki, Azerbaycan həm Türkiyə, həm də İsrail ilə yaxın əlaqələrə malik bir ölkədir. Rəsmi Bakı ilə Ankara münasibətləri “bir millət, iki dövlət” prinsipi üzərində qurulub. Xüsusilə Dağlıq Qarabağ müharibəsindən sonra bu əlaqələr “strateji müttəfiqlik” səviyyəsinə yüksəlib.
Eyni zamanda Azərbaycan və İsrail arasında da son 20 ildə təhlükəsizlik və müdafiə sənayesi sahəsində ciddi əməkdaşlıq qurulub. Azərbaycanın İranla sərhəddə yerləşməsi isə İsrail üçün geosiyasi baxımdan xüsusi əhəmiyyət daşıyır.
Azərbaycan Prezidenti İlham Əliyev aprelin 9-da Bakıda keçirilən “Yeni Dünya Nizamına Doğru” forumunda çıxışı zamanı bildirib ki, Türkiyə və İsrail arasında yaranmış gərginlikdən narahatdırlar. O vurğulayıb ki, böhran başladığı ilk günlərdən etibarən Azərbaycan bu prosesdə gizli vasitəçi rolunu oynayıb.
“Yardımçı olmaq üçün əlimizdən gələni edəcəyik. Hazırkı mərhələdə bundan artıq danışmaq düzgün olmaz. Türkiyə ilə İsrail arasında ilk arabuluculuğumuz zamanı da açıqlama vermədik. Bu gün də oxşar proseslər davam edir", – İlham Əliyev bildirib.
O əlavə edib ki, Türkiyə-İsrail münasibətlərinin gərgin olması təkcə Azərbaycan üçün deyil, bütün dünya üçün mənfi nəticələr doğura bilər. Əliyev bu münasibətlərin normallaşmasının vacibliyini vurğulayıb və bu prosesin davam etməli olduğunu bildirib.
Fatimə Məmmədova
23:55 10.04.2025
Oxunuş sayı: 1692
