"Azərbaycan İsraillə Türkiyə arasında vasitəçi ola bilər" - DEPUTAT
Azərbaycan Prezidenti İlham Əliyevin ADA Universitetində keçirilən “Yeni dünya nizamına doğru” mövzusunda beynəlxalq forumda səsləndirdiyi fikirlər bir sıra mühüm məsələlərə aydınlıq gətirib. Xüsusilə Türkiyə ilə İsrail arasında baş verən gərginlik fonunda Azərbaycanın əvvəlki dövrdə oynadığı vasitəçilik rolu və gələcəkdə bu istiqamətdə mümkün töhfələri diqqət mərkəzinə çəkilib. Prezidentin sözlərinə görə, Azərbaycan hər iki ölkə ilə yaxın dost və strateji tərəfdaşdır. Məhz bu etimad və tərəfdaşlıq zəminində rəsmi Bakı iki dövlət arasında baş verən ilk böhran zamanı fəal rol oynayıb və münasibətlərin normallaşmasına töhfə verib. Dövlət başçısının bu məsələ ilə bağlı qəti və prinsipial mövqeyi ondan ibarətdir ki, Türkiyə və İsrail arasında münasibətlərin pozulması regional təhlükəsizlik üçün ciddi risklər yaradır və bu ziddiyyətlərin aradan qaldırılması üçün Azərbaycan bundan sonra da təşəbbüslə çıxış etməyə hazırdır.
Məlum olduğu kimi, bu gün Ankara ilə Təl - Əviv arasında münasibətlər kifayət gərgindir. Xüsusilə, İsrailin Yaxın Şərqdə davam etdirdiyi müharibə Türkiyənin qəti mövqeyinə səbəb olur. Hazırda davam edən proseslər ikitərəfli münasibətlərin daha da gərginləşə biləcəyini ortaya qoyur. Maraqlıdır, Azərbaycan yenə tərəflər arasında vasitəçi ola bilərmi?
Bu barədə Crossmedia.az-a danışan Milli Məclisin deputatı Elman Nəsirov deyib ki, dövlət başçısı ADA Universitetində keçirilən və sayca yeddinci olan “Yeni dünya nizamına doğru” mövzusunda beynəlxalq forumda çıxışı zamanı bir sıra fundamental məsələlərə toxunub.
Parlamentari son dövrlərdə Türkiyə ilə İsrail arasında yaranmış gərginliyə diqqət çəkib və bu istiqamətdə Azərbaycanın rolu barədə fikirlərini bölüşüb: "Bu Türkiyə ilə İsrail arasında baş verən ilk gərginlik deyil. Keçmişdə də oxşar hallar yaşanıb və Azərbaycan bu iki dövlət arasında münasibətlərin normallaşmasına bir dəfə artıq töhfə verib".
Deputat vurğulayıb ki, Türkiyə Azərbaycan üçün strateji müttəfiqdir. "2021-ci ildə Şuşada imzalanmış Bəyannaməyə əsasən, iki ölkə arasındakı münasibətlər strateji tərəfdaşlıqdan hərbi müttəfiqlik səviyyəsinə yüksəlib. İsrail isə Azərbaycanın dost ölkəsidir. Bu kontekstdə Azərbaycan üçün unikal imkan yaranır – hər iki tərəflə yüksək səviyyəli münasibətlər fonunda tərəflər arasında yaranmış ziddiyyətlərin aradan qaldırılmasına şərait yarana bilər. Bir dəfə bu missiya Azərbaycanın təşəbbüsü və iştirakı ilə həyata keçirilib və bu prosesdə əsas yük Azərbaycan üzərinə düşüb. Eyni zamanda, əgər ehtiyac yaranarsa, ölkəmiz hazırda da bu istiqamətdə yenidən öz töhfəsini verməyə hazırdır".
Deputatın fikrincə, dövlət başçısının bu məsələ ilə bağlı prinsipial mövqeyi ondan ibarətdir ki, Azərbaycan həm strateji müttəfiqi olan Türkiyə, həm də dost dövlət olan İsraillə münasibətlərin davamlı şəkildə yüksək səviyyədə qalmasında və iki ölkə arasında əlaqələrin əvvəlki vəziyyətə qayıtmasında maraqlıdır: ""Prezident İlham Əliyev vurğulayıb ki, Türkiyə ilə İsrail arasında gərginliyin davam etməsi regionda təhlükəsizlik baxımından ciddi təhdidlər yarada bilər".
Xumar Emilqızı
15:20 09.04.2025
Oxunuş sayı: 22867
