Moskvada akademik Məmməd Əliyevin 70 illiyinə həsr edilmiş kitabın təqdimatı olub
Moskvada Rusiya Səhiyyə Nazirliyinin “NMİK radiologiya” Federal Dövlət Büdcə Müəssisəsinin (FDBM) Elmi şurasında Rusiya Elmlər Akademiyasının (REA) akademiki Məmməd Əliyevin 70 illik yubileyinə və onun “Sümük və yumşaq toxumalarda şişlər” milli tədqiqat əsərinə həsr olunmuş təntənəli iclas keçirilib.
Crossmedia.az xəbər verir ki, tədbirdə Rusiya və beynəlxalq tibb elminin qabaqcıl nümayəndələri iştirak ediblər.
Giriş nitqi ilə çıxış edən Azərbaycanın Rusiyadakı səfiri Rəhman Mustafayev Azərbaycan Prezidenti İlham Əliyevin akademik Məmməd Əliyevin “Şərəf” ordeni ilə təltif olunması haqqında Sərəncamının mətnini oxuyub və şəxsən öz adından, diplomatik korpusdakı həmkarları adından onu təbrik edib.
O, akademikin yeni müalicə üsullarının və cərrahi yanaşmaların inkişafında xidmətlərini qeyd edərək, bunu onun elmi tərcümeyi-halının mühüm tərkib hissəsi adlandırıb. Səfir vurğulayıb ki, bu gün təkcə görkəmli alimə deyil, həm də böyük mentora hörmətlə yanaşılır. O qeyd edib ki, M.Əliyevin Onkologiya Mərkəzində işlədiyi ilk illərdə Azərbaycan elmi məktəbinin nümayəndələrinin sayı az idi. “Sizin sayənizdə bu gün Rusiya, Azərbaycan və əcnəbi alimlərin bütöv qalaktikası formalaşıb və onlar məhz sizin rəhbərliyik etdiyiniz məktəbi keçiblər”, -deyə diplomat bildirib.
R.Mustafayevin çıxışında M.Əliyevin ictimai fəaliyyətinə xüsusi diqqət yetirilib: “Siz uzun illər Ümumrusiya Azərbaycanlılar Konqresinə rəhbərlik etmisiniz. Sizin şəxsiyyətiniz Azərbaycan icması üçün birləşdirici qüvvəyə çevrildi və Konqresin özü də Azərbaycan ilə Rusiya arasında münasibətlərin hərtərəfli inkişafına yönəlib”.
Tibb elmləri doktoru, professor, REA-nın akademiki, Rusiya Səhiyyə Nazirliyinin “NMİK radiologiya” FDBM-in baş direktoru, P.A.Gertsen adına Moskva Onkoloji Tədqiqatlar İnstitutunun direktoru Andrey Karpin Rusiya Prezidenti Vladimir Putinin təbrik teleqramının mətnini oxuyub.
Təntənəli iclas zamanı yubilyarın ünvanına tanınmış alimlər, onun həmkarları, akademik və tibb dairələrinin təmsilçiləri, həmçinin diplomatların təbrikləri ünvanlanıb.
Sümük və yumşaq toxumalarda şişlər” milli tədqiqatı Rusiyada dayaq-hərəkət aparatı şişlərinin müalicəsində ilk klinik, diaqnostik, terapevtik üsulları birləşdirən fundamental praktik nəşrdir. Monoqrafiyanın hazırlanmasında bu ölkənin aparıcı ekspertləri iştirak ediblər. Artıq bu kitab elmi icma tərəfindən müasir onkoloji ortopediyanın inkişafına mühüm töhfə kimi qiymətləndirilir.
Akademik Məmməd Əliyev tibb elmləri doktoru, professor, Rusiya Elmlər Akademiyasının və Rusiya Tibb Elmləri Akademiyasının akademiki, Gürcüstan Milli Elmlər Akademiyasının əcnəbi üzvü, Dövlət Mükafatı və Hökumət Mükafatı laureatı, Rusiyanın Əməkdar elm xadimidir.
Soydaşımız “Dostluq” və “Şöhrət” ordenləri, Azərbaycan Prezidentinin Fəxri diplomu, habelə Rusiyanın “Dostluq” ordeni və digər dövlət mükafatları ilə təltif edilib.
O, peşəkar fəaliyyəti ilə yanaşı, həm də fəal ictimai xadim kimi tanınır. Məmməd Əliyev 15 ildən artıq Rusiyadakı soydaşlarımızın ən böyük diaspor təşkilatı olan Ümumrusiya Azərbaycanlılar Konqresinə rəhbərlik edib.
12:40 09.04.2025
Oxunuş sayı: 1843
